უზენაესი სასამართლოს თავმჯდომარეობის კანდიდატის დასახელებასთან დაკავშირებით პრეზიდენტსა და არასამთავრობოებს შორის შეთანხმება ვერ შედგა

პოლიტიკა - 18:57, 20 Aug, 2018

1552

ადამიანის უფლებებისა და მართლმსაჯულების საკითხებში საქართველოს პრეზიდენტის მრჩევლის კახა კოჟორიძის განცხადებით, არსებობს ფართო, საზოგადოებრივი კონსენსუსი იმასთან დაკავშირებით, რომ სასამართლო სისტემაში ძალიან მძიმე მდგომარეობაა და სწორედ, ამ კონსენსუსის და მძიმე მდგომარეობის გათვალისწინებით, პრეზიდენტმა გააკეთა შეთავაზება, რომ საჭიროა, საერთო ძალისხმევა ამ მდგომარეობიდან გამოსასვლელად, მან გააკეთა შეთავაზება, რომ ამ პროცესში ჩართულიყო იურიდიული წრეების ფართო წარმომადგენლობა და დაესახელებინათ შესაბამისი კანდიდატი.

აღნიშნული განცხადება კახა კოჟორიძემ დღეს პრეზიდენტისა და არასამთავრობო სექტორის წარმომადგენლებთან უზენაესი სასამართლოს თავმჯდომარის კანდიდატურასთან დაკავშირებით გამართული შემაჯამებელი კონსულტაციების დასრულების შემდეგ გააკეთა, რომელიც დღეს სასახლეში გაიმართა.

"ჩვენ თავიდანვე ვთქვით, რომ არსებობს რამდენიმე მოდელი, რომლებითაც შესაძლებელი იყო სარგებლობა ამ სიტუაციაში. სამწუხაროდ, ფორმატთან დაკავშირებით შეთანხმება ვერ მოხერხდა.

გასაგებია, რომ არსებობდა სხვადასხვა მოსაზრებები, თუ რატომ შეიძლებოდა ეს ვერ გამოსულიყო, თუმცა პრეზიდენტს მიაჩნდა, რომ ამ სიტუაციაში ეს შესაძლებელია და მართლმსაჯულების სისტემის მძიმე მდგომარეობას დაეხმარებოდა მაქსიმალური საზოგადოებრივი კონსენსუსი, იურიდიული წრეების კონსენსუსი როგორც პროცესთან, ასევე კონკრეტულ კანდიდატთან დაკავშირებით," - აღნიშნა კახა კოჟორიძემ, რომელმაც აღნიშნა, რომ უახლოეს მომავალში პრეზიდენტი თავად მიაწვდის საზოგადოებას საკუთარ გადაწყვეტილებას.

სამოქალაქო სექტორის წარმომადგენლების შეფასებით, მათთვის უცნობია, დაასახელებს თუ არა გიორგი მარგველაშვილი კანდიდატს.

„თუკი იგი ვინმეს შეარჩევს და გვკითხავს აზრს კონკრეტულ კანდიდატთან დაკავშირებთ, ჩვენ მას მივაწოდოთ ჩვენი შეფასება ამ კანდიდატთან დაკვშირებით - ამაზე საუბარი არ ყოფილა. საუბარი იყო იმაზე, რომ პასუხისმგებლობა უნდა აიღოს პრეზიდენტის ადმინისტრაციამ და კონკრეტულად პრეზიდენტმა ამ ყველაფერზე. არც დროა ახლა იმის, რომ გრძელვადიანი პროცესი შევქმნათ და ამ ყველაფერში შემოვიდეს სამოქალაქო სექტორი,“- განაცხადა „საერთაშორისო გამჭვირვალობა-საქართველოს“ აღმასრულებელმა დირექტორმა, ეკა გიგაურმა.

იურისტების ნაწილმა გიორგი მარგველაშვილის პოზიცია გაიზიარა, რომ უმჯობესია არასამთვრობო სექტორმა ერთიანი პოზიცია წარუდგინოს პრეზიდენტს, მან კი - პარლამენტს.

საქართველოს პრეზიდენტმა გიორგი მარგველაშვილმა შეხვედრისას არასამთავრობო სექტორსა და პროფესიულ წრეებს უზენაესი სასამართლოს თავმჯდომარის კანდიდატის შერჩევაში აქტიური ჩართულობისაკენ მოუწოდა და განაცხადა, რომ იგი არასამთავრობოების მიერ შერჩეულ კანდიდატს წარუდგენს საქართველოს პარლამენტს.

უზენაესი სასამართლოს თავმჯდომარის კანდიდატურის შესარჩევად პრეზიდენტ გიორგი მარგველაშვილის ინიციატივით დაწყებული კონსულტაციები უკვე რამდენიმე კვირაა მიმდინარეობს და კონსულტაციების ფარგლებში შვიდი შეხვედრა შედგა. მასში მონაწილეობა მიიღეს სამოქალაქო სექტორის, საერთაშორისო ორგანიზაციების, პროფესიული -აკადემიური- სამეცნიერო წრეებისა და ოპოზიციური პარტიების წარმომადგენლებმა.

შეხვედრას დღეს პრეზიდენტის ადმინისტრაციის უფროსი გიორგი აბაშიშვილი, უშიშროების საბჭოს მდივანი დავით რაქვიაშვილი, პრეზიდენტის საპარლამენტო მდივანი ანა ნაცვლიშვილი, პოლიტიკური მდივანი ფიქრია ჩიხრაძე, ადამიანის უფლებების საკითხებში პრეზიდენტის მრჩეველი კახა კოჟორიძე ესწრებოდნენ.