15-20 მილიონის ზარალი მუნიციპალიტეტს?-რა წერია აუდიტის დასკვნაში რამაც მერაბ ჭანუყვაძეს თანამდებობა დააკარგვინა

პოლიტიკა - 17:47, 20 Aug, 2018

3675

დღეს, გურიის გუბერნატორი, მერაბ ჭანუყვაძე მეორედ გადადგა.

მართალია, დაახლოებით ერთი თვის წინ გადადგომასთან დაკავშირებით დაწერილი განცხადება ნაჩქარევი აღმოჩნდა და თანამშრომლებთან დამშვიდებობის შემდეგ, რამდენიმე საათში ისევ გუბერნიაში დაბრუნდა, თუმცა ამჯერად, პრემიერის გადაწყვეტილება საბოლოო აღმოჩნდა, რადგან მისი შემცვლელი გუბერნატორის წასვლიდან ერთ საათში დაასახელა.

რატომ წავიდა თუ გაუშვეს გურიის გუბერნატორი? ამ საკითხზე "გურიის მოამბეს" კარგად ინფორმირებული წყარო ესუბრა, რომელიც გვეუბნება, რომ ჭანუყვაძის წასვლის მთავარი მიზეზი, აუდიტის დასკვნა, პროკურატურისა და ანტიკორუფციული დეპარტამენტის მიერ მოკვლეული და გამოვლენილი დარღვევები აღმოჩნდა:

"ეს ყველაფერი მაინც მოჰყვა ძირითადად ხალხის მღელვარებას. ამდენი გაყიდული მიწა, ცალკე კარიერები, აჯანყდა ხალხი. ეს არავის არ აწყობს იმ მუნიციპალიტეტში, სადაც ბატონი ბიძინა ცხოვრობს და ამდენი მამულები აქვს.

ჩემი აზრით, ყველაფერი მაინც მიწების თემით დაიწყო. ფაქტიურად ის, რაზეც მოსახლეობა ხმამაღლა საუბრობდა, დადასტურდა, რომ მიზერულ ფასებში იყიდებოდა მუნიციპალიტეტის საკუთრებაში არსებული მიწის ნაკვეთები. საშინელი დარღვევებია აუქციონების ჩატარების კუთხით არის კატასტროფული დარღვევები. ბევრ მუნიციპალიტეტში შეისწავლა აუდიტმა ადგილობრივი ხელისუფლების საქმიანობა, მაგრამ, აქ მიწების გაყიდვის მხრივ, არის ყველაზე დიდი დარღვევები. ანუ, აქ ხდებოდა რა, ურეკი, ნატანები, შრომა ეს მიწები გადიოდა აუქციონზე და შემდეგ მისი მფლობელები სულ რაღაც თეთრებში ხდებოდნენ მისი გარემოცვის წევრები. მათი ნათესავები, ან ოჯახის წევრები. მისთვის მომგებიანი გარიგების მიზნით, ხდებოდა ეს ყველაფერი და ამით, მუნიციპალიტეტისთვის მიყენებული ზარალი 15-20 მილიონის ლარის ფარგლებში მერყეობს.

მაგალითად, ნახეთ რაც მოხდა შრომაში. 50 თეთრად გაიყიდა 109 ლარის ღირებულების მიწის ნაკვეთი, ამაზე სერიოზული ხმაური ატეყეს პედაგოგებმა და ეს მიწა დააყადაღა ანტიკორუფციულმა. ეს კარიერების საკითხიც ძალიან ცუდად დაემთხვა ყველაფერს. ანუ, მივიდნენ იმ დასკვნამდე, რომ ყველა მიმართულებით აქ არეული სიტუაცია იყო"-გვეუბნება წყარო.

აუდიტის სამსახურმა ოზურგეთის მუნიციპალიტეტის ყოფილი მერისა და ყოფილი გამგებლის (მაშინ ჯერ კიდევ მოქმედი გუბერნატორის, მერაბ ჭანუყვაძის) 2016-17 წლის საქმიანობის შესწავლა დაახლოებით 6 თვის წინ დაიწყო. ამის პარალელურად, საქმის შესწავლა დაიწყო პროკურატურამ და ანტოკორუფციულმა.