„მოქალაქე ბედის ანაბარად არის მიტოვებული“ - გრიგოლ ვაშაძე ჩოხატაურის აგრარულ ბაზარში გლეხებს შეხვდა

პოლიტიკა - 14:47, 19 Aug, 2018

1582

გაერთიანებული ოპოზიციის - „ძალა ერთობაშია-ს“ კანდიდატი გრიგოლ ვაშაძემ და ოპოზიციის სხვა ლიდერებმა მოსახლეობასთან შეხვედრები გურიაში დაიწყეს. ისინი ჩოხატაურის აგრარულ ბაზარში ადგილობრივ გლეხებს გაესაუბრნენ.

გურიაში ერთ-ერთი მწვავე პრობლემაა აზიურ ფაროსანას მიერ განადგურებული სასოფლო სამეურნეო პროდუქცია.

მოსახლეობა ხელისუფლებას სრულ უყურადღებობაში ადანაშაულებს.

"შიმშილობაა, ოთხასი ძირი პომიდორი გამოვიტანე და ფაროსანათი არის სავსე, გაისათ ქუჩაში ნახავთ ხალხს, რომლებიც შიმშილით დაიხოცებიან. სოფლის მეუნეობის მინისტრის მოადგილე იყო ლანჩხუთში და ყველაფერი რიგზეაო თხილზე და ჩვენთან ერთი კაკალი თხილი არ არის. ფაროსანამ ყველაფერი მოსპო, კიტირი, პომიდორი, ლობიო, ყველაფერი..."- აცხადებენ ადგილობრივები.

გრიგოლ ვაშაძის თქმით, არჩევნებში გამარჯვების დღიდან მისი და მისი გუნდის ერთ-ერთი მთავარი ორიენტირი იქნება სოფლის მეურნეობის მხრადაჭერა და სახელმწიფო პროგრამები, რომელიც მსგავსი პრობლემების პრევენციას მოახდენს.

„გაერთიანებული ოპოზიცია ამ ხელისუფლებას შეცვლის, საპრეზიდენტო არჩევნებს მოვიგებთ და შემდეგ მყისიერად ჩავატარებთ ვადამდელ საპარლამენტო არჩევნებს. სხვა ჩვენს სახელმწიფოს არაფერი უშველის, რადგან მოქალაქე არის ბედის ანაბარად მიტოვებული“ - განაცხადა გრიგოლ ვაშაძემ.