"ოკუპაცია ჩვენი ქვეყნის მთავარი გამოწვევა და საფრთხეა"- იზორია თრუსოს ხეობაში სასაფლაოს დანაღმვას გამოეხმაურა

პოლიტიკა - 16:11, 18 Aug, 2018

1300

თრუსოს ხეობაში, სასაფლაოს დანაღმვას და მოსალოდნელ პროვოკაციას, საქართველოს თავდაცვის მინისტრი ლევან იზორია გამოეხმაურა. მისი თქმით ქვეყნის მთავარი გამოწვევა და საფრთხე ოკუპაციაა და ხელისუფლება საფრთხეების პრევენციას ახლაც და მომავალშიც საერთაშორისო საზოგადოებასთან, განსაკუთრებით, კი სადამკვირვებლო მისიის აქტიური მონაწილეობით განახორციელებს:

„ის, რომ ოკუპაცია არის მთავარი გამოწვევა და საფრთხე ჩვენი ქვეყნის, ეს არის აღიარებული საერთაშორისოდ. ის, რომ ჩვენ ჩვენს საერთაშორისო თანამეგობრობასთან ერთად, ჩვენს სტრატეგიულ პარტნიორებთან ერთად, ყოველდღიურად მაქსიმუმს ვაკეთებთ, რომ ავიმაღლოთ ამის წინააღმდეგ ხმა და გადავდგათ ასევე პრაქტიკული ნაბიჯები იმისთვის, რომ მოვახდინოთ პრევენცია გარკვეული საფრთხეების, ვაკეთებთ ყველაფერს და ამისთვის მომავალშიც გაგრძელდება მუშაობა, იქნება ეს ცალკეული ინციდენტები თუ ცალკეული კონკრეტული ფაქტები, ჩვენ მაქსიმალურად საერთაშორისო საზოგადოებასთან, განსაკუთრებით, კი სადამკვირვებლო მისიის აქტიური მონაწილეობით მოვახდენთ ამ საფრთხეების პრევენციას,“ - განაცხადა ლევან იზორიამ.

ორი დღის წინ სოფელ კობში ქართულ სასაფლაოზე ნაღმი იპოვეს. დანაღმული სასაფლაოს შესახებ ინფორმაცია ანტისაოკუპაციო მოძრაობის „ძალა ერთობაშია“-ს წევრებმა გაავრცელეს. მოძრაობის წევრების თქმით, სასაფლაოზე საოკუპაციო რეჟიმის დროშაც იყო აღმართული.

ნაღმის არსებობა შინაგან საქმეთა სამინისტრომ დაადასტურა და მომხდარზე გამოძიება დაიწყო.