დედაქალაქის საკრებულომ თბილისის მერიის ურბანული სამსახურის უფროსის თანამდებობაზე ალექსანდრე ტოგონიძე დაამტკიცა. საკრებულოს ოპოზიციას დღეს კენჭისყრაში მონაწილეობა არ მიუღია და შესაბამისად, მათ მხარი არ დაუჭერიათ ალექსანდრე ტოგონიძისთვის.

„თბილისის ურბანული საქალაქო სამსახურის უფროსად დაგვინიშნეს არა ურბანისტი ადამიანი, პროფესიონალი, არამედ სწორედაც ბიძინა ივანიშვილის კომპანიებში მომუშავე და სამშენებლო კომპანიებში მომუშავე ადამიანი, რომელსაც არანაირი შეხება ურბანული თვალსაზრისით ამ საქმესთან არ ჰქონდა. ეს კიდევ ერთხელ მიუთითებს იმაზე, რომ ისინი აპირებენ გააგრძელონ, ბიძინა ივანიშვილის და მათი მაფიოზური კლანის მაფიოზური სამშენებლო ინტერესების გაგრძელება,“ - განაცხადა ირაკლი ნადირაძემ.

მმართველი გუნდის წევრებისთვის საკრებულოს ოპოზიციის არგუმენტები მიუღებელია.

თბილისის საკრებულოს ფრაქცია ”ქართული ოცნება - დემოკრატიული საქართველოს” თავმჯდომარის, ბექა დავითულიანის თქმით, ალექსანდრე ტოგონიძეს სხვადასხვა კომპანიაში მიღებული გამოცდილება ახალ თანამდებობაზე გამოადგება.

ალექსანდრე ტოგონიძემ დამტკიცების შემდეგ სამომავლო გეგმებზე ისაუბრა.

„პირველ რიგში, უნდა იყოს პროცესების ოპტიმიზაცია, რომ ბარიერები ნებისმიერ ადამიანს, ვისაც ურბანულთან ექნება შეხება იყოს მაქსიმალურად დაბალი და კომფორტული ჩვენთან მუშაობა,“ - განაცხადა ტოგონიძემ.