აგროწარმოების ხელშეწყობის პროგრამაში პრიორიტეტებად 30 წლამდე ახალგაზრდებისა და ქალების (ასაკის შეუზღუდავად) ჩართულობა განისაზღვრება, რათა წახალისდეს ახალგაზრდებისა და ქალების მონაწილეობა ფერმერულ საქმიანობაში, მიეცეთ მათ საშუალება მოახდინონ ცოდნისა და უნარების მაქსიმალური რეალიზაცია სოფლის მეურნეობაში და შეძლონ გაზარდონ ბიზნესის მასშტაბები.

ამ დრომდე პროგრამას 300-ზე მეტი ბენეფიციარი ჰყავს საქართველოს თითქმის ყველა რეგიონში. აგროწარმოების ხელშეწყობის პროგრამა 2017 წელს დაიწყო და გრძელდება.

აგროწარმოების ხელშეწყობის პროგრამა ბენეფიციარის მიერ წარმოდგენილი პროექტის ჯამური ღირებულების 40 პროცენტის დაფინანსებას ითვალისწინებს.

პროგრამა მოიცავს კომპონენტებს როგორც ინდივიდუალური ფერმერების, ასევე გადამამუშავებელი საწარმოების და სასოფლო-სამეურნეო კოოპერატივების თანადაფინანსებას.

პროგრამის ფარგლებში დასაფინანსებელი კულტურებია ხურმა, ვაშლი, ატამი, ბოსტნეული, დაფნა, კენკროვანი , კაკალი, თაფლი, ყვავილების კულტურები.

აგროწარმოების ხელშეწყობის პროგრამის მიზანია პირველადი წარმოების პროდუქტის ხარისხისა და მოსავლიანობის ზრდის ხელშეწყობა; არსებული ბაღების პოტენციალის მაქსიმალური გამოყენებისა და მოქმედი გადამამუშავებელი და შემნახველი აგროსაწარმოების გაფართოებისა და მოდერნიზაციის ხელშეწყობა; გარდა ამისა, პროგრამის ამოცანაა საერთაშორისო სტანდარტებისა და თანამედროვე ტექნოლოგიების დანერგვა აგროწარმოებაში.

პროგრამა ხორციელდება „სოფლის მეურნეობის მოდერნიზაციის, ბაზარზე წვდომის და მოქნილობის პროექტის" (AMMAR) ფარგლებში და ფინანსდება სოფლის მეურნეობის განვითარების საერთაშორისო ფონდის (IFAD) და გლობალური გარემოს დაცვის ფონდის (GEF) მიერ.

პროგრამა ინიცირებულია სოფლის მეურნეობის სამინისტროს მიერ და მას ა(ა)იპ "სოფლის მეურნეობის პროექტების მართვის სააგენტო" "ერთიანი აგროპროექტის" ფარგლებში ახორციელებს.