საქართველოს პრემიერ-მინისტრის მამუკა ბახტაძის განცხადებით, მმართველ გუნდს პრეზიდენტობის დამოუკიდებელი კანდიდატის სალომე ზურაბიშვილის მხარდაჭერასთან დაკავშირებით გადაწყვეტილება ჯერ არ მიუღია. მამუკა ბახტაძის თქმით, "ქართულმა ოცნებამ" რამდენიმე კვირიანი პაუზა აიღო და ჯერჯერობით მოვლენებს აკვირდება.

„რაც შეეხება სალომე ზურაბიშვილის მხარდაჭერას, ჩვენმა პოლიტიკურმა გუნდმა აიღო რამდენიმეკვირიანი პაუზა. ჩვენ ვაკვირდებით მოვლენებს, ჩვენ ვაკვირდებით იმასაც, თუ რომელი კანდიდატი დარეგისტრირდება და მონაწილეობის სურვილს გამოთქვამს და ამის შემდგომ მივიღებთ გადაწყვეტილებას,“ - განაცხადა პრემიერმა.

მამუკა ბახტაძე სალომე ზურაბიშვილის იმ განცხადებასაც გამოეხმაურა, სადაც ზურაბიშვილმა თქვა, რომ მას პრეზიდენტის ამჟამინდელ რეზიდენციაში ყოფნას, ორბელიანების სასახლეში ყოფნა ურჩევნია:

„ჟურნალისტებისთვის ძალიან ნათლადაა ცნობილი ჩემი მიდგომა, გადასახადების გადამხდელებს რა უნდა უჯდებოდეს სახელმწიფოს და მისი შტოების შენახვა. ასე რომ, მე მაქვს ეს პრინციპული პოზიცია ყველა შტოსთან მიმართებაში, მათ შორის, რა თქმა უნდა, პრეზიდენტის ინსტიტუტთან მიმართებაშიც ვრცელდება ჩემი მიდგომა“, - განაცხადა პრემიერმა.