სოზარ სუბარის განცხადებას დავით უსუფაშვილზე, თავად „შენების მოძრაობის“ ლიდერი ეხმაურება და აცხადებს, რომ მმართველ გუნდში ვიღაც მიხვდა, რომ ბოლო დღეებში სუპერთვითდამაზიანებელ განცხადებებს აკეთებენ:

„გვითხრეს, ჩვენ არ გვჭირდება ავტორიტეტული პრეზიდენტი, ამიტომ არ შევარჩიეთ არავინ ჩვენი გუნდიდან, ვეძებთ ვინმე ისეთს, ვინც არ იქნება ძლიერი, წონიანი ფიგურა, შესაბამისად სასახლეშიც სხვაგან უნდა წავიყვანოთ, რომ პრეზიდენტზე ქვეყანაში ზედმეტი წარმოდგენები არ იყოსო. მიხვდა ვიღაც, რომ ეს არის სუპერთვითდამაზიანებელი მათთვის და სუპერდამაზიანებელი მათი რჩეული კანდიდატისთვის. ახლა ამ თემის მიფუჩეჩებას და სხვა თემების წინ წამოწევას ცდილობენ“, – განაცხადა უსუფაშვილმა.

მისი თქმით, საქართველოს კონსტიტუციით პრეზიდენტს პარლამენტის თავმჯდომარესთან შედარებით, 10-ჯერ უფრო მეტი უფლებამოსილება და პოლიტიკური წონა აქვს.

„ის სახელმწიფოს მეთაურია და აქ პარლამენტის თავმჯდომარეზე ვსაუბრობთ. თუ ამ კრიტერიუმებით ავწონ-დავწონით და ვიტყვით, რომ პრეზიდენტს პირველ სართულზე უნდა მივუჩინოთ ადგილი, მაშინ დიახ, პარლამენტის თავმჯდომარეს მინუს მესამეზე ეკუთვნის. ამის მიღება პერსონალურ ან ინსტიტუციის შეურაცხყოფად სრულიად მიუღებელია. ეს არის მხოლოდ თემის გადაფარვის მცდელობა, რადგან ძირითად კითხვებზე, რაც მე ხელისუფლების მიმართ დავსვი, პასუხები არ აქვთ. ამიტომაც აღნიშნულ თემაზე ხმაური ატეხეს“, – განაცხადა უსუფაშვილმა.