გაერთიანებული ოპოზიციის , „ძალა ერთობაშია“ წევრები, არასამთავრობო ორგანიზაციების წარმომადგენლებს შეხვდნენ. ღონისძიება IFES-ის ორგანიზებული იყო და მას ინტერპარტიულ ჯგფუში შემავალი პარტიების ნაწილიც დაესწრო.

გიორგი ვაშაძემ და თინა ბოკუჩავამ, წინასაარჩევნოდ არსებულ დარღვევებზე ისაუბრეს. კერძოდ, საოლქო საარჩევნო კომისიის ნეიტრალური წევრების არჩევის პროცესში მასიური ნეპოტიზმის ფაქტების შესახებ.

„თამარ ჟვანიას, როგორც „ქართული ოცნების“ ერთ-ერთ წევრს, დავალებული აქვს, შექმნას გაყალბების მექანიზმი, რომ ხმების მანიპულაცია მოახდინოს. ჩვენ, არასამთავრობო ორგანიზაციებთან, დიპლომატიურ კორპუსთან ერთად, ყველაფერს გავაკეთებთ იმისათვის, რომ ეს არ მოხდეს და არ დავუშვათ.

ძალიან ბევრი მექანიზმი, მათ შორის ტექნოლოგიური მექანიზმი გვექნება გამოყენებული ამ ყველაფრისთვის. მე მოვუწოდებ თამარ ჟვანიას, რომ ხელი აიღოს პირდაპირი გაყალბების მცდელობისგან, რომელიც მას აქვს. უპრეცედენტოა ის რაც ხდება - ამდენი ცოლის დანიშვნა. ჯერ არ გვქონია მსგავსი პრეცენდენტი. მარაზმში გადავდივართ უბრალოდ. კიდევ ერთხელ ვამბობ, რომ ჩვენ ყველაფერს გავაკეთებთ, ყველა მექანიზმს გამოვიყენებთ, რათა ქვეყანაში ჩატარდეს სამართლიანი არჩევნები“ - განაცხადა გიორგი ვაშაძემ.