დღეს გამართულ მთავრობის სხდომაზე დედაქალაქის მერმა დიდუბის რაიონში 4 სართულიანი სასტუმროს მშნებლობის ნებართვის გაუქმებაზე ისაუბრა, კახა კალაძის თქმით დაშვებული იყო შეცდომა და თბილისის მთავრობამ ეს შეცდომა გამოასწორა და ნებართვა გააუქმა:

“მინდა შევეხო ერთ ძალიან საინტერესო და სენსიტიურ თემას - იყო კონკრეტული პროექტი, რომელიც შეეხებოდა ოთხსართულიანი სასტუმროს მშენებლობას დიდუბის რაიონში, წერეთლის გამზირზე მე-12, მე-13, მე-14 და მე-15 კორპუსების მიმდებარე ტერიტორიაზე; შუა ნაწილში უნდა მომხდარიყო ამ სასტუმროს აშენება, ძალიან მჭიდრო და შეზღდულ ტერიტორიაზე უნდა მომხდარიყო კორპუსებს შორის ამ სასტუმროს „ჩაკვეხება“, რამაც მოსახლეობის დიდი უკმაყოფილება გამოიწვია. უბრალოდ, სამწუხაროა ის, რომ ჩვენ მიერ იყო ეს ნებართვა გაცემული. მაშინ ახალი მოსულები ვიყავით და ახალი დაწყებული გვქონდა მუშაობა. გაიპარა ეს, არ უნდა გაცემულიყო ეს ნებართვა. ჩვენ ვიღებთ ამ შეცდომას და შენიშვნას და ნებართვა არის გაუქმებული.“ - განაცხადა კალაძემ.

კალაძის თქმით, მოხდა შეთანხმება და მოხდება პროექტის ადგილმონაცვლეობა. დედაქალაქის მერმა შესაბამის სამსახურებს დავალება მისცა, რომ აღნიშნულ ტერიტორიაზე მწვანე სივრცის მოწყობა მოხდეს.

"მოლაპარაკება გვქონდა კერძო მესაკუთრესთან, ვისიც იყო ეს კონკრეტული ტერიტორია. შევთანხმდით, რომ ადგილმონაცვლეობას გავაკეთებთ. მინდა, მას თანამშრომლობისთვის მადლობა გადავუხადო, რადგან ამ კონკრეტულ ადგილზე პროექტის განხორციელება შეუძლებელი იყო, მითუმეტეს, სასტუმროს აშენება.„მინდა, ირმა ზავრადაშვილს დავავალო, რომ ამ კონკრეტულ ადგილზე მცხოვრებ ადამიანებს მწვანე სივრცე, ძალიან ლამაზი სკვერი მოვუწყოთ. თუ ჩვენი დახმარებაც იქნება საჭირო, მზად ვართ, პროცესში მონაწილეობა მივიღოთ."- აღნიშნა კალაძემ.