ე.წ. ციანიდის საქმე და დეკანოზი გიორგი მამალაძე - მას შემდეგ რაც პატრიარქის ქორეპისკოპოსმა მეუფე იაკობმა დეკანოზი გიორგი მამალაძე საკვირაო წირვისას „ავაზაკად“ მოიხსენია, საკითხი კვლავ აქტუალური გახდა.

დღეს საპატრიარქოში საგანგებო შეხვედრა გაიმართა, ასევე კომენტარი გააკეთა ჭყონდიდის მიტროპოლიტმა მეუფე პეტრემ, რომელმაც განაცხადა, რომ პატრიარქის მოსაყდრეს მეუფე შიოს „არ ეყო ღირსება თავად შესულიყო ან წარმომადგენელი გაეგზავნა დაკავებული დეკანოზის მოსანახულებლად“.

მეუფე პეტრეს აღნიშნულ განცხადებას დეკანოზმა ანდრია ჯაღმაიძემ უპასუხა:

„დიანა ტრაპაძის ტელეშოუში მეუფე პეტრეს გაკეთებულ ერთ რეპლიკას ვუპასუხებდი, საქმე ეხება მის განცხადებას, როდესაც ის ბრძანებს, რომ მიტროპოლიტ შიოს არ აღმოაჩნდა ღირსება იმისათვის, რომ ციხეში შესულიყო ან ვინმე ნდობით აღჭურვილი პირი შეეგზავნა მამა გიორგი მამალაძის სანახავად, მინდა ვთქვა, რომ ინფორმაცია, რაც მეუფე პეტრემ ბრძანა არ არის მართალი, მე წინა კვირას ვიყავი მეუფე შიოს კურთხევით მამა გიორგი მამალაძესთან სანახავად და ჩვენი შეხვედრა ორ საათზე მეტხანს გაგრძელდა, მართალია, ეს იყო მდიასაშუალებების გარეშე, გაშუქების გარეშე მოხდა ეს და უფრო ადრეც, როდესაც ჯერ კიდევ მეუფე გრიგოლი აპირებდა შესვლას მამა გიორგი მამალაძესთაბ, მეუფე პეტრემ შესთავაზა მას, რომ მე შევყოლოდი, თუმცა, მაშინ მეუფე გრიგოლმა უარი განაცხადა და მეუფე ილარიონთან ერთად იყო შესული მამა გიორგისთან. ძალიან სამწუხაროა როდესაც ასეთი მკვეთრი უარყოფითი ეპითეტებით მოიხსენიებს სინოდის წევრი მოსაყდრეს და ეს კეთდება დაუზუსტებელი და არასწორი ინფორმაციის გავრცელების ფონზე“, - აღნიშნა დეკანოზმა ანდრია ჯაღმაიძემ.