ლარის კურსი რეკორდულად ეცემა - ხელისუფლება საგანგაშოს ვერაფერს ხედავს

პოლიტიკა - 18:24, 10 Aug, 2018

2841

ხელისუფლება ლარის რეკორდული სისწრაფით გაუფასურებაში საგანგაშოს ვერაფერს ხედავს. მათი შეფასებით, ეკონომიკაში ნეგატიური ფაქტორები არ მომხდარა და შესაბამისად, ლარის გაუფასურება ამას არ უკავშირდება.

მთავრობაში ამბობენ, რომ ზოგადად, რეგიონში შექმნილი ვითარება ახდენს საქართველოში შექმნილ სიტუაციაზე გავლენას.

საქართველოს ეკონომიკისა და მდგრადი განვითარების მინისტრის მოადგილე, ეკატერინე მიქაბაძე აცხადებს, რომ დღეს არსებული მდგომარეობით ლარი სტაბილურობის შენარჩუნებას შეძლებს.

„მინდა აღვნიშნო, რომ ის ფუნდამენტური მაკროეკონომიკური ფაქტორები, რომლებიც ლარის გრძელვადიან კურს განაპირობებს, იძლევა სრულ საფუძველს იმისა, რომ ლარმა სტაბილურობა შეინარჩუნოს. აღსანიშნავია, ის დადებითი მომენტები, რომელიც გვაქვს ჩვენ ეკონომიკაში, ეს არის მაღალი ეკონომიკური ზრდა, როგორც მოგეხსენებათ წლიური ზრდა განვლილ 6 თვეში შეადგენს 5.7 პროცენტს, ხოლო მეორე კვარტალში 6 პროცენტიანი ზრდა გვქონდა. ამასთან მნიშვნელოვანი ზრდა გვაქვს ექსპორტში, ტურიზმში,“ - განაცხადა მიქაბაძემ.

საკითხზე კომენტარი პარლამენტის დარგობრივი ეკონომიკისა და ეკონომიკური პოლიტიკის კომიტეტის თავმჯდომარემ, რომან კაკულიამაც გააკეთა.

„საქართველოს ეკონომიკაში რაიმე ნეგატიურ ტენდენციებთან ჩვენ ადგილი არ გვაქვს და პირიქით, დადებითი ტენდენციები შენარჩუნებული არის. მეორე, რაც აუცილებლად უნდა იქნას გასათვალისწინებელი, იმიტომ, რომ მოკლევადიან პერიოდში ჩვენ შეიძლება ეს გამოწვევად გვქონდეს, ეს ნამდვილად არის რეგიონში არსებული დევალვაციები იქაური ვალუტების,“ - განაცხადა რომან კაკულიამ.

ლარი საგრძნობლად გაუფასურდა - თბილისის სავალუტო ჯიხურებში ერთი აშშ დოლარი 2.55-2.56 ლარის ფარგლებში მერყეობს.