უზენაესი სასამართლოს თავმჯდომარის კანდიდატურა - პრეზიდენტის საპარლამენტო მდივანმა ანა ნაცვლიშვილმა განაცხადა, რომ შერჩევასთან დაკავშირებით მიმდინარე კონსულტაციების ფარგლებში, საპარლამენტო უმრავლესობასა და პარლამენტის სხვა პოლიტიკურ ძალებს შეხვედრა შესთავაზა პრეზიდენტის ადმინისტრაციამ, კონკრეტული თარიღების დასახელებას კი მათგან ელოდებიან:

„ჩვენი მხრიდან შეთავაზება გაკეთებულია და ახლა მათგან გვაქვს მოლოდინი, რომ დაასახელებენ მათთვის მისაღებ კონკრეტულ დროს“, – განაცხადა ნაცვლიშვილმა.

მისი თქმით, კონსულტაციების ფარგლებში სხვადასხვა ჯგუფთან და ორგანიზაციასთან შეხვედრები გრძელდება.

„შეხვედრების მიზანია, მოვისმინოთ კონკრეტული რჩევები და რეკომენდაციები უზენაესი სასამართლოს თავმჯდომარეობის კანდიდატურის შერჩევის პროცესთან, ასევე იმ მახასიათებლებთან მიმართებაში, რომლებიც უნდა ჰქონდეს ადამიანს, რომელიც შეძლებს დღევანდელ მდგომარეობაში დაიკავოს აღნიშნული თანამდებობა და ღირსეულად გაართვას თავი სასამართლო სისტემის წინაშე მდგომ ამოცანებს“, – განაცხადა ნაცვლიშვილმა.