მთავრობის წევრები პრეზდენტობის დამოუკიდებელი კანდიდატის სალომე ზურაბიშვილის მხარდაჭერის შესახებ განმარტებებს აკეთებენ. მინისტრების განცხადებით, გადაწყვეტილება მას შემდეგ იქნება მიღებული, რაც კანდიდატების საარცევნო პროგრამებს მოისმენენ. ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის მინისტრი, დავით სერგეენკო სალომე ზურაბიშვილის სკანდალურ განცხადებას ეხმაურება და აცხადებს, რომ ქვეყანა საკუთარ ტერიტორიაზე ომს არ იწყებს.

„ჩვენი ქვეყნის ტერიტორიაზე ჩვენ ჩენ თავს ვერ დავუწყებდით ომს, რაც შეეხება ამის კავშირს რომელიმე, მათ შორის სალომე ზურაბიშვილის წინასაარჩევნო კამპანიასთან, მე ერთხელ ვთქვი და გავიმეორებ რამდენჯერაც საჭირო იქნება, რაც შეეხება მხარდაჭერას განვსაზღვრავთ მას შემდეგ, რაც მოვისმენთ მის ხედვას და მის პროგრამას“, - განაცხადა დავით სერგეენკომ.

რუსეთის მხრიდან განხორციელებულ ოკუპაციაზე საუბრობს საქართველოს საგარეო საქმეთა მინისტრი, დავით ზალკალიანი. მისი თქმით, სალომე ზურაბიშვილი დამოუკიდებელი კანდიდატია და მმართველ გუნდს მისთვის ჯერ მხარდაჭერა არ გამოუცხადებია.

„2008 წელს განხორციელდა რუსეთის მხრიდან აგრესია, რასაც მოჰყვა ჩვენი ქვეყნის ტერიტორიების ოკუპაცია, ეს არის ის პოზიცია, რომელსაც ჩვენ მუდმივად ვაფიქსირებდით. ქალბატონი სალომე ზურაბიშვილი არის დამოუკიდებელი კანდიდატი, „ქართულმა ოცნებამ“ გააკეთა განცხადება, რომ მას არ ჰყავს კანდიდატი“, - აღნიშნა დავით ზალკალიანმა:

რუსეთის მხრიდან განხორციელებულ აგრესიასა და შედეგებზე სახელმწიფო მინისტრმა შერიგებისა და სამოქალაქო თანასწორობის საკითხებში, ქეთევან ციხელაშვილმა ისაუბრა.

„ეს გახლდათ აგრესია, ეს გახლდათ ომი, რომელიც არ დაწყებულა აგვისტოში და ძალიან დიდი ხანი მზადდებოდა სწორედ რუსეთის მიერ, მათ შორის შედეგები ამ ომისა, სამწუხაროდ არც ქართველების, არც აფხაზები, ოსების ინტერესში არ შედის და დღესაც ემსახურება რუსეთის პოლიტიკურ და სამხედრო მოკლევადიან ინტერესებს ეს ფაქტი, აქ პასუხი არის ცალსახა, ეს არის რუსული აგრესია და ინტერვენცია“, - განაცხადა ქეთევან ციხელაშვილმა.