დაუჭერს თუ არა საპრეზიდენტო არჩევნებში სალომე ზურაბიშვილს მხარს მმართველი გუნდი - დღეს გამართულ პრესკონფერენციაზე პრემიერ-მინისტრმა მამუკა ბახტაძემ განაცხადა, რომ ამ საკითხთან დაკავშირებით გადაწყვეტილება ჯერ არ არის მიღებული. ბახტაძე ზურაბიშვილის მიერ გაკეთებულ განცხადებებს გამოეხმაურა და განაცხადა, რომ რუსეთი არის აგრესორი, მან განახორციელა საქართველოს ტერიტორიების ოკუპაცია და ეს არის ერთმნიშვნელოვანი.

„მოგახსენებთ ჩემ პირად აზრს ამ საკითხთან დაკავშირებით, რა თქმა უნდა, რუსეთი არის აგრესორი, მან მოახდინა ჩვენი ტერიტორიების ოკუპაცია და ეს არის ერთმნიშვნელოვანი. უფრო მეტიც, მას ეს არ გაუკეთებია მხოლოდ 2008 წელს, 90-იანი წლების დასაწყისშივე რუსეთი ახორციელებდა საქართველოს ტერიტორიების ფაქტობრივ ანექსიას.

აქვე ისიც მინდა განვაცხადო, რომ ბევრი ევროპელი პოლიტიკოსი, მათ შორის, ჩვენი ამერიკელი მეგობრები აცხადებენ, რომ ჩვენი მეგობარი ქვეყნები აფრთხილებდნენ საქართველოს მაშინდელ პოლიტიკურ ხელმძღვანელობას, რომ რუსეთის გეგმავდა საომარი ოპერაციების სცენარის განხორციელებას, ხოლო სამწუხაროდ, მაშინდელმა ხელმძღვანელობამ იმის მაგივრად, რომ თავიდან აერიდებინა მსგავსი მოვლენების განვითარება და მოეხდინა ჩვენი მეგობარი ქვეყნების, მსოფლიოს თანამეგობრობის ჩართულობით პრევენციაზე ორიენტირება, მან ვერ შეუშალა ხელის რუსეთის მიერ დაგეგმილი სცენარის განხორციელებას საქართველოში. მათ ვერ აარიდეს ქვეყანას ეს საფრთხე და შესაბამისად, მთელი საქართველო აღმოჩნდა კატასტროფულ სიტუაციაში.

მინდა კიდევ ერთხელ შეგახსენოთ, რომ რუსეთის ფედერაცია საქართველოს ტერიტორების ფაქტობრივ ანექსიას ახორციელებდა 90-იან წლების დასაწყისშივე, მაშინ, როდესაც ჩვენ მოვიპოვეთ დამოუკიდებლობა და სწორედ ამის შემდეგ ჩაირთო ის აგრესიული მანქანა, რომელმაც გააგრძელა თავისი სცენარების რეალიზება უკვე 2008 წელს“, – განაცხადა მამუკა ბახტაძემ.