"შენს მოსახლეობაზე მასიური დაბომბვის დაწყებას რა ჰქვია - გიჟი პრეზიდენტის ახირება თუ მტერთან გარიგება" - ზურაბიშვილი ომის დაწყებაში ისევ საქართველოს ადანაშაულებს

პოლიტიკა - 11:23, 08 Aug, 2018

4579

საპრეზიდენტო კანდიდატს, სალომე ზურაბიშვილს, რომელიც 2008 წლის აგვიტოს ომის დაწყებაში საქართველოს ადანაშაულებს, მისი ხმაურიანი განცხადების განმარტება მუხათგვერდის ძმათა სასაფლაოზე მოუწია. მან აგვისტოს ომში დაღუპულ გმირთა მემორიალი გვირგვინით შეამკო.

საპრეზიდენტო კანდიდატს ჟურნალისტებმა დღეს კიდევ ერთხელ ჰკითხეს, ვინ დაიწყო აგვისტოს ომი, სალომე ზურაბიშვილმა აღნიშნა:

„თუ თქვენ გინდათ იმის კვალიფიკაცია, რა მოხდა, მაშინ მე სხვანაირად დავსვამ ამ კითხვას. როგორი კვალიფიკაცია უნდა მივცეთ იმ მოვლენებს, როცა დაიწყო საომარი მოქმედებები, იმ დროს, როცა საქართველოს არანაირი უპირატესობა არ ჰქონდა, იმ დროს, როცა საქართველო იყო გაფრთხილებული თავისი ყველა მოკავშირესგან, რომ სამხედრო ნაბიჯი არ გადაედგა, გაფრთხილებული იყო, რომ არანაირი დახმარება არ იქნებოდა. როცა შენ დახმარების იმედი არა გაქვს, როცა შენ უპირატესობა არა გაქვს, როცა მოულოდნელობის ფაქტორი შენს მხარეს არ არის, რომ შენ სიურპრიზით იმოქმედო, როცა შენ იცი, რომ საზღვარზე მიმდინარეობს ივლისიდან წვრთნები და იქ ასეული ჯავშანტექნიკაა, ათასობით ჯარისკაცი რუსული მხრიდან დგანან და რაღაცას ელოდებიან, როცა ეს ყველაფერი არის სახეზე, იმ მომენტში პროვოკაციაზე აყოლა და შენს ტერიტორიაზე, შენს მოსახლეობაზე მასობრივი დაბომბვის დაწყება, მე არ ვიცი, ამას რა ჰქვია - უგუნურობა, გიჟი პრეზიდენტის ახირება, თუ რაღაც უცნაური და გაუგებარი გარიგება ჩვენს საუკუნოვან მტერთან. ეს არის ის კითხვა, რომელსაც თქვენ უნდა სვამდეთ, რომელზედაც ანალისტები და ჟურნალისტები უნდა ფიქრობდნენ და ცდილობდნენ, რომ პასუხი გაეცეს, რადგან ჩვენ თუ არ გავეცით პასუხი ამ კითხვაზე, მომავალში ჯერ კიდევ შეგვიძლია აღმოვჩნდეთ სასტიკ სიტუაციაში, რადგან უცვლელია ჩვენი მტერი, უცვლელია საუკუნე, თუ აღარ ჩავთვლით რუსეთის იმპერიის წინა ქმედებებს და ეს ვიცით”, - განაცხადა სალომე ზურაბიშვილმა.