"აშშ-ის პოზიცია რუსეთის მიერ ოკუპირებული საქართველოს რეგიონებთან, აფხაზეთთან და სამხრეთ ოსეთთან დაკავშირებით ურყევია, ეს რეგიონები არ ეკუთვნის რუსეთის"- ჰიზერ ნოიერტი

პოლიტიკა - 09:56, 08 Aug, 2018

1219

რუსეთ-საქართველოს ომიდან 10 წლის თავზე, შეერთებული შტატები კვლავ მოუწოდებს რუსეთს გაიყვანოს სამხედრო ძალები საქართველოს ოკუპირებული ტერიტორიებიდან და შეასრულოს 2008 წელს ნაკისრი ვალდებულებები.

ამერიკის სახელმწიფო დეპარტამენტის ოფიციალური წარმომადგენელი ჰიზერ ნოიერტი ამბობს, რომ ეს რეგიონები საქართველოს განუყოფელი ნაწილია და შეერთებული შტატების პოზიცია ამ საკითხზე უცვლელია.

"შეერთებული შტატების პოზიცია რუსეთის მიერ ოკუპირებული საქართველოს რეგიონებთან, აფხაზეთთან და სამხრეთ ოსეთთან დაკავშირებით, მტკიცე და ურყევია. ეს რეგიონების საქართველოს შემადგენელი ნაწილია და ისინი არ ეკუთვნის რუსეთის. შეერთებული შტატები განაგრძობს საქართველოს სუვერენიტეტის, დამოუკიდებლობისა და ტერიტორიული მთლიანობის მხარდაჭერას მის საერთაშორისოდ აღიარებულ საზღვრებში. შეერთებული შტატები მოუწოდებს რუსეთს გაიყვანოს სამხედრო ძალები საქართველოდან, ომამდელ პოზიციებზე, 2008 წლის ცეცხლის შეწყვეტის შეთანხმების თანახმად. რაც შეეხება საქართველოს ნატოში გაწევრიანებას, ბუქარესტის სამიტზე ალიანსმა მიიღო გადაწყვეტილება, რომ საქართველო გახდება ნატოს წევრი და ეს პროცესი გრძელდება," - განაცხადა ჰიზერ ნოიერტიმ.

10 წლის წინ დადებული შეთანხმების შესრულებისკენ მოუწოდებს რუსეთს გერმანიაც და საქართველოს ოკუპირებული რეგიონების დამოუკიდებელ სახელმწიფოებად ცალმხრივ აღიარებას მიუღებლად მიიჩნევს.

რუსეთის მიერ საქართველოს წინააღმდეგ განხორციელებული აგრესიიდან 10 წლისთავთან დაკავშირებით საქართველოს მხარდამჭერი განცხადებები დანიის, იაპონიის, სლოვაკეთისა და სხვა ქვეყნების საგარეო უწყებებმაც გაავრცელეს.