ესპანეთში გაათავისუფლეს ტერორისტი, რომელსაც 3000 წელი ჰქონდა მისჯილი

მსოფლიო - 16:35, 05 Aug, 2018

3092

ბასკური ტერორისტული ორგანიზაცია "ეტას" ერთერთი ყველაზე ცნობილი ტერორისტი, 70 წლის სანტიაგო აროსპიდე სარასოლა (სანტი პოტროსი), რომელსაც თავის დროზე ესპანეთის სასამართლომ თითქმის 3000 წელი მიუსაჯა, გათავისუფლებულია. მან ციხეში 31 წელი დაჰყო.

პოტროსი 1987 წელს საფრანგეთში დააპატიმრეს, სადაც მან ციხეში 13 წელი გაატარა. 2000 წელს იგი საფრანგეთმა ესპანეთს გადასცა, სადაც სასამაღთლომ მას 11 ტერაქტის ორგანიზებაში მონაწილეობისათვის 3000 წლამდე ციხე მიუსაჯა. 2006 წელს ესპანეთის სასამართლომ მისი ყველა საქმე გააერთიანა და დაადგინა, რომ ნებისმიერი პატიმარი ციხეში 30 წელზე მეტი არ უნდა იჯდეს. შესაბამისად პოტროსი 2030-ში უნდა გამოსულიყო ციხიდან. შემდეგ მას ვადა 2025 წლამდე შეუმცირეს. თუმცა, 2006-ში ევროკავშირმა მიიღო გადაწყვეტილება, რომ პატიმრის მიერ ევროკავშირის წევრ ქვეყნებში, სხვადასხვა ციხეში გატარებული წლები ვადა უნდა შეკრებილიყო და იგი გაათავისუფლეს, თუმცა 2015 ისევ დაიჭირეს და ბარსელონასა და მადრიდში მოწყობილი ტერაქტებისთვის ციხეშ დააბრუნეს.

სანტი პოტროსი 40-ზე მეტი ტერაქტის მოწყობაში იღებდა მონაწილეობას, მათ შორის ყველაზე სისხლიანია მადრიდში, დომინიკის რესპუბლიკის მოედანზე მოწყობილი ტერაქტი, რომელსაც ეროვნული გვარდიის 12 წევრი ემსხვერპლა და 1987 წელს, ბარსელონას სუპერმარკეტ Hipercor-ის ტერაქტი, რომელსაც 21 ადამიანი შეეწირა.