საოლქო საარჩევნო კომისიის დროებით წევრებად ოცნების მხარდამჭერები ან სუს-თან დაახლოებული პირები დაინიშნენ

საოლქო საარჩევნო კომისიის დროებით წევრებად ოცნების მხარდამჭერები ან სუს-თან დაახლოებული პირები დაინიშნენ - ენმ (ვიდეო)

პოლიტიკა - 12:15, 05 Aug, 2018

1200

ერთიანი ნაციონალური მოძრაობის პროტესტის მიუხედავად, ცენტრალურმა საარჩევნო კომისიამ გუშინ საოლქო საარჩევნო კომისიების დროებითი წევრები დაამტკიცა. 74 მსურველიდან ცესკომ 72 მსურველი შეარჩია.

ცესკოს წევრი ნაციონალური მოძრაობიდან დავით კირთაძე აცხადებს, რომ საოლქო საარჩევნო კომისიები ქართული ოცნების საარჩევნო შტაბს დაემსგავსა. მან რამდენიმე ფაქტიც დაასახელა, რომელთა თანახმადაც, კომისიის წევრებად ადგილობრივ ხელისუფლებაში მომუშავე სუსთან დაახლოებული და ქართული ოცნების მხარდამჭერი პირები დაინიშნენ.

„საოლქო საარჩევნო კომისიის წევრებად, სრული უმრავლესობა არიან ან „ქართული ოცნების“ საარჩევნო შტაბის მხარდამჭერები ან სუს-თან დაახლოებული პირები. ზუსტად ამიტომ იყო, რომ "ქართულ ოცნებას" არ სურდა საკითხის გადადება, ზუსტად ამიტომ იყო, რომ საარჩევნო ადმინისტრაცია არ ჩაერთო გასაუბრების პროცესში, რადგან მათი კრიტერიუმი მხოლოდ იყო „ქართული ოცნების“ მხარდამჭერთა სიაში ყოფნა. მაგალითისთვის შემიძლია გითხრათ, რომ გურჯაანში თორნიკე წინწელაშვილი, რომელიც არის მერიაში შიდა აუდიტის სამსახურის თანამშრომელი, რომელიც ქართული ოცნების აქტიური წევრია. ასევე შემიძლია გითხრათ, სამტრედიაში ქეთევან შანშიაშვილი, რომელიც ბაღის გამგეა და სუს-თანდაახლოებული პირია. ასევე მარტვილის საოლქო კომისიაში ეკატერინე წოწონავა, რომელიც გამგეობის თანამშრომლის შვილია, რომელიც შტაბში კურირებს საარჩევნო კომისიებს. ზუსტად ეს არის მზადება არჩევნების გაყალბებისთვის,“ - განაცხადა ცენტრალური საარჩევნო კომისიის წევრმა, დავით კირთაძემ.