რა ინფორმაცია მიწოდეს საგამოძიებო კომისიას მოზარდების მკვლელობის საქმეზე მოწმეებმა - აბესაძე არ გამორიცხავს, რამდენიმე მათგანი განმეორებით დაკითხონ

პოლიტიკა - 17:28, 04 Aug, 2018

1166

ხორავას ქუჩაზე მოზარდების მკვლელობის საქმეზე შექმნილმა პარლამენტის დროებითმა საგამოძიებო კომისიამ არასრულწლოვნები შესაძლოა, განმეორებით გამოკითხოს.

დღევანდელი გამოკითხვით, პრაქტიკულად, არასრულწლოვნების გამოკითხვა სრულდება, თუმცა კომისიის ერთ-ერთი წევრი დეპუტატი ირაკლი აბესაძე არ გამორიცხავს, რომ განმეორებითი გამოკითხვები გახდეს საჭირო.

"დღეს კომისია ფაქტობრივად დაამთავრებს მთლიანობაში არასრულწლოვნების გამოკითხვას. შესაძლებელია დაგვჭირდეს განმეორებით რომელიმე მათგანის გამოკითხვა, რადგან რამდენიმე მათგანი საქართველოში არ იმყოფება და მათი დაბრუნების შემდგომ შესაძლებელია შედგეს გამოკითხვა. ამ გამოკითხვებით მნიშვნელოვანწილად დასტურდება ის გარემოებები და ის ფაქტები, რომლის შესახებაც წინა გამოკითხვების დროს მივიღეთ ინფორმაციები. არის მათ შორის გარკვეული ფაქტები, რომლებზეც არასრულწლოვნები არ საუბრობენ, აქედან გამომდინარე, ყველაფერი ამის შეფასება კომისიას მოუწევს თავის საბოლოო დასკვნაში, რომელზე მუშაობასაც უკვე უახლოეს დღეებში კომისია დაიწყებს. კომისია ვალდებულია გამოკითხოს ყველა ის ფიგურანტი, რომელსაც შესაძლებელია ჰქონდეს საქმისთვის მნიშვნელოვან გარემოებებზე ინფორმაცია. ჩვენ ვცდილობთ მაქსიმალურად ყველა არასრულწლოვანი, რომელიც იმყოფებოდა ჩხუბის ადგილას ან იმყოფებოდა მიმდებარე ტერიტორიებზე და ჰქონდათ შეხება ჩხუბში მონაწილე ადამიანებთან, გამოვკითხოთ და მივიღოთ მათგან ინფორმაცია იმაზე რა მოხდა ხორავას 4 ნომერში. ამ ეტაპზე არასრულწლოვნების გამოკითხვა შეგვიძლია მთლიანობაში ჩავთვალოთ დამთავრებულად. შესაძლებელია დაგვჭირდეს რამდენიმე მათგანის განმეორებით გამოკითხვა, ან ის არასრულწლოვნები გამოვკითხოთ, რომელიც ახლა არ იმყოფებიან საქართველოში .

მთელი ამ გამოკითხვების განმავლობაში, არასრულწლოვნებზე რჩებოდა შთაბეჭდილება, რომ ბევრ მათგანს შესაძლებელია ჰქონდეს ინფორმაცია მომხდარი გარემოებების შესახებ, თუმცა ისინი ვერ იხსენებენ ამ ფაქტებს, ერთი - იმის გამო, რომ ძალიან დიდი დროა გასული ამ გარემოებების შემდეგ და თავის დროზე ისინი პოლიციამ არ დაკითხა თანმიმდევრულად ან საერთოდ არ დაკითხა და მეორე - მათ არ სურთ ამ გარემოებებზე საუბარი", - აღნიშნა აბესაძემ.