ცესკოში ენმ-ს წარმომადგენელი სადამკვირვებლო ორგანიზაციებს მოუწოდებს, საოლქო საარჩევნო კომისიაში დროებითი წევრების შერჩევაში ჩაერთონ

პოლიტიკა - 13:28, 03 Aug, 2018

732

ცესკოში “ერთიანი ნაციონალური მოძრაობის” წარმომადგენელი დავით კირთაძე ადგილობრივ და საერთაშორისო სადამკვირვებლო ორგანიზაციებს მოუწოდებს, საოლქო საარჩევნო კომისიაში დროებითი წევრების შერჩევის პროცესში ჩაერთონ.

მისი თქმით, “ქართული ოცნების” კადრების შერჩევა შეიძლება, არჩევნების გაყალბების საფუძველი გახდეს.

“როგორც მოგეხსენებათ, არჩევნების გამოცხადების შემდეგ ცენტრალურმა საარჩევნო კომისიამ საოლქო საარჩევნო კომისიაში დროებით წევრებზე კონკურსები გამოაცხადა იმისათვის, რომ პროცესი გამჭვირვალე იყოს და არ მოხდეს “ქართული ოცნების” შტაბიდან მოწოდებული კადრების არჩევა, რადგან შემდეგ ეს გამოიწვევს არჩევნების გაყალბებას, რისი საფუძვლიანი ეჭვიც არსებობს. “ქართული ოცნება” ამ ოლქის სრულად დაკომპლექტებას ცდილობს. ამიტომ მოვუწოდებ საერთაშორისო და ადგილობრივ სადამკვირვებლო ორგანიზაციებს, რომ ხვალ დილით, 11:00 საათიდან დავიწყოთ კონკურსანტებთან შეხვედრა, რათა გამოცდილი და კვალიფიციური კადრები შეირჩეს, რომლებიც აუცილებლად მიუკერძოებულები იქნებიან, რათა დემოკრატიული, სამართლიანი და გამჭვირვალე არჩევნები ჩატარდეს”, - განაცხადა ცენტრალურ საარჩევნო კომიისის წევრმა, დავით კირთაძემ.

რაც შეეხება ცენტრალური საარჩევნო კომისიის პოზიციას, მათი ინფორმაციით, კანონმდებლობა საოლქო საარჩევნო კომისიაში დროებითი წევრების არჩევას გასაუბრების გზით არ ითვალისწინებს. მათივე თქმით, წევრების შერჩევა ხვალ, ცესკოს სხდომაზე დადგენილი წესით მოხდება.

აღსანიშნავია, რომ გუშინ ცენტრალურმა საარჩევნო კომისიამ საოლქო კომისიის დროებითი წევრების შერჩევის კონკურსთან დაკავშირებით ინფორმაცია გაავრცელა. როგორც ინფორმაციაშია აღნიშნული, ამ ეტაპზე გამოცხადებულია კონკურსი საოლქო საარჩევნო კომისიების დროებითი წევრების ვაკანტური ადგილების დასაკავებლად და ასევე, მიმდინარეობს უფლებამოსილი პარტიების მიერ საოლქო საარჩევნო კომისიების დროებითი წევრების დანიშვნის პროცესი. „შესაბამისად, საარჩევნო პროცესების ღიაობისა და გამჭვირვალობის ხელშესაწყობად მნიშვნელოვანია ჩართული მხარეების აქტიური მონაწილეობა.

ცესკო მიმართავს საარჩევნო პროცესებში ჩართულ მხარეებს, დროულად გაიარონ რეგისტრაციისთვის საჭირო პროცედურები და აქტიურად ჩაერთონ მიმდინარე საარჩევნო პროცესებში”,-ნათქვამია განცხადებაში.