„ველოდებით თქვენს დასკვნას, ამისთვის შეიქმენით“ - გახარია სუბელიანის წინააღმდეგ ახალი გამოძიების დაწყებაზე საუბრობს

პოლიტიკა - 13:02, 03 Aug, 2018

1105

ხორავას ქუჩაზე არასრულწლოვნების მკვლელობის საქმის შემსწავლელი საპარლამენტო კომისიის სხდომა მიმდინარეობს, სადაც შს მინისტრ გიორგი გახარიას და ყოფილ მთავარ პროკურორს, ირაკლი შოთაძეს უსმენენ.

ოთარ კახიძე დაინტერესდა თვლიდნენ თუ არა გიროგი გახარია და ირაკლი შოთაძე, რომ გამოძიება უნდა დაიწყოს, რომელმაც უნდა შეისწავლოს მირზა სუბელიანი ხომ არ იყენებდა სამსახურეობრივ მდგომარეობას ან პირად ნაცნობობას იმისთვის, რომ ხელი შეეშალა გამოძიებისთვის.

“ამ ეტაპზე ვთვლი, რომ მირზა სუბელიანთან დაკავშირებით გამოძიება დაწყებულია, ის არის დაკავებული და ეს სრულიად საკმარისია იმისთვის, რომ თუ გამოვლინდა დამატებითი ფაქტორები, ბრალის კვალიფიკაცია შეიცვალოს - თქვა გახარიამ კონკრეტული კითხვის საპასუხოდ და იქვე დასძინა, რომ „რეალურად, მირზა სუბელიანი, მისი შვილი და მისი ნათესავები არიან ერთეულები იმ მცირეოდენ ადამიანებს შორის, ვინც მაშინაც თანამშრომლობდა გამოძიებასთან და დღესაც თანამშრომლობს“.

“დაველოდებით კომისიის დასრულებას, რომლის ძირითადი მიზანიც არის, რომ გამოვავლინოთ ის შესაძლო პროცედურული დარღვევები, ან უფლებამოსილების გადამეტება და ამის შემდეგ ვიმსჯელებთ თქვენთან ერთად ამ საქმეზე. ველოდებით თქვენს დასკვნას, ამისთვის ხართ შექმნილი“, - განაცხადა გახარიამ.

აღნიშნულ კითხვაზე ყოფილმა მთავარმა პროკურორმა ირაკლი შოთაძემაც უპასუხა.

„ფაქტობრივი გარემოებები შეფასებულია, ის გამოძიება, რაც მირზა სუბელიანის მიმართ უნდა დაწყებულიყო, დაწყებულია. იმაზე, რა შესაძლო დანაშაულებრივი ფაქტიც შეიძლება ყოფილიყო ჩადენილი, სისხლის სამართლებრივი დევნა არის დაწყებული და სხვა რაიმე ფაქტზე რომ ყოფილიყო გამოძიება დასაწყები, დაიწყებოდა. ყველა საგამოძიებო მოქმედება, რაც უნდა ჩატარებულიყო, ჩატარდა“, - აღნიშნა შოთაძემ.