გარუჯვისას ხდება ორგანიზმის გადახურება, იმატებს რადიაციის დონე

გარუჯვისას ხდება ორგანიზმის გადახურება, იმატებს რადიაციის დონე - რა უნდა იცოდეთ გარუჯვის მოყვარულებმა

ეს საინტერესოა - 16:59, 16 Jul, 2019

2920

ზაფხულის სეზონის დადგომასთან ერთად აქტიური სამზადისი იწყება, თუ სად და როგორ გავირუჯოთ. ეს, ერთი შეხედვით სასიამოვნო პროცესი კანისთვის საზიანოდ რომ არ გადაგვექცეს, მზის აბაზანის მიღებისას შესაბამისი წესები უნდა დავიცვათ.

ზოგადად გარუჯვა - კანის ტრავმატიზაციაა, რადგან, როდესაც კანის მექანიკური ტრავმირება ხდება, კანი წითლდება, გარუჯვისას კი - შავდება, რაც მისი დაცვითი რეაქციაა და ეს არანაირი სიჯანსაღის მომტანი არ არის. მაგრამ რადგან ადამიანებს ძალიან მოსწონთ, დასაშვებია, ოღონდ არსებობს გარკვეული წესები, რომლებიც გარუჯვის დროს უნდა დავიცვათ.

გარუჯვისას ორგანიზმის გადახურება ხდება, ულტრაიისფერი გამოსხივების ჭარბი დოზით მიღება და ა.შ. ოზონის შრის გათხელებასთან და გლობალურ პროცესებთან დაკავშირებით, რა თქმა უნდა, რადიაციის დონე იმატებს, ეს ყოველთვის ასე იყო და ასე გაგრძელდება.

პირველ რიგში, უნდა ვიცოდეთ, რომ როდესაც მზე ზენიტშია (როცა საკუთარი ჩრდილი ტანზე მოკლეა) - 12-დან 3 საათამდე, მეტი სხივი მოდის და ოზონის შრეში მისი გარდატეხა არ ხდება, ამიტომ, უფრო მეტი დასხივება და დამწვრობა შეიძლება მიიღოთ, კანის ტრავმატიზაციის საფრთხე მეტია.

აუცილებლად უნდა გამოვიყენოთ მზისგან დამცავი საშუალებები, რომლებიც ყველა კანისთვის ინდივიდუალურად უნდა შეირჩეს

ზღვის აბაზანის შემდეგ წყალი უნდა გადავივლოთ და მკვებავი წავისვათ.

სასურველია, წყლიდან ამოსვლისას წვეთები შეიმშრალოთ, რადგან, როგორც გამადიდებელი შუშის ქვეშ, კონცენტრირებული მზის სხივი მხოლოდ ერთ ადგილას ხვდება და შეიძლება, დამწვრობა წარმოიქმნას.
როცა ბუშტები ჩნდება, ეს უკვე დამწვრობის ხარისხია და ექიმს უნდა ვუჩვენოთ. ჩვეულებრივ გაწითლებაზე გამაგრილებელი საშუალებები უნდა გამოვიყენოთ, ცივი წყლით დავამუშაოთ, ბევრი სითხე მივიღოთ და ნებისმიერი დამატენიანებელი წავისვათ.