ჟურნალ Mayo Clinic Proceedings-ში გამოქვეყნებული სტატიის თანახმად, ფინური აბანოს (საუნის) ხშირი სტუმრობა საგრძნობლად ამცირებს გულსისხლძარღვთა სისტემის დაავადებების რისკს, აუმჯობესებს ტვინისა და ფილტვების მუშაობას.

"ჯერჯერობით არ ვიცით, თუ რა მიზეზით ხდება ეს, შეიძლება თუ არა საუნაში ხშირი სიარული ჩაითვალოს ამ დაავადებათა პროფილაქტიკის მეთოდად, რომელიც სხვა მეთოდებს ჩაანაცვლებს. ერთი ცხადია, საუნა აბსოლუტურად უსაფრთხოა ადამიანისთვის," - აცხადებენ ფინელი მეცნიერი იარი ლაუკანენი და მისი კოლეგები იუვიასკულას უნივერსიტეტიდან.

უკანასკნელ ათწლეულში ჩატარებული კვლევების ანალიზის შედეგად, მათ დაადგინეს, რომ საუნის მოყვარულები 44%-ით ნაკლებად კვდებოდნენ გულის უეცარი გაჩერების შედეგად. ასევე, 65%-ით ნაკლებად ავადდებოდნენ ალცჰეიმერის დაავადებითა და ბებრული მარაზმით.

47%-ით იკლებდა ჰიპერტონია, ფილტვების დაავადება, ასთმა და პნევმონიის შემთხვევები.

სხვადასხვა დროს ჩატარებულ კვლევებში 2000 მამაკაცი და ქალი მონაწილეობდა. მეცნიერები არც იმ ფაქტს გამორიცხავენ, რომ ჯანმრთელი ადამიანები უფრო ხშირად დადიან საუნაში, მაგრამ მეცნიერებმა ისიც დაადგინეს, რომ საუნაში სტუმრობის შემდეგ ადამიანთა არტერიული წნევა იკლებდა. ასევე უმჯობესდებოდა ფილტვების მუშაობა. ასევე დადგენილია, რომ საუნა ამცირებს ქოლესტერინის დონეს ორგანიზმში. მეცნიერები აცხადებენ, რომ თავისი ჰიპოთეზის შესამოწმებლად მზად არიან ყველა მსურველზე დაკვირვება აწარმოონ ხანგრძლივი დროის განმავლობაში.