ყველაზე მარტოხელა ადამიანი მსოფლიოში ბრაზილიაში ცხოვრობს (ვიდეო)

ეს საინტერესოა - 17:25, 02 Aug, 2018

3474

ბრაზილიაში, ამაზონის ჯუნგლებში, მსოფლიოს ყველაზე მარტოხელა ადამიანი ცხოვრობს. ის მისი ტომის უკანასკნელი წარმომადგენელია. არც მისი და არც მისი ტომის სახელი არავინ იცის, თუმცა, ცნობილია, რომ ის დაახლოებით 50 წლისაა და 23 წელია სრულ მარტოობაშია. იგი ცხოვრებას მშვილდ-ისრით ნადირობაში ატარებს, სოფლის მეურნეობასაც ეწევა - დათესილი აქვს პაპაია და სიმინდი. მისი საცხოვრებლის ირგვლივ უამრავი ორმოა, რისი მეშვეობითაც ის ცხოველებსაც იჭერს, თავსაც აფარებს და უსაფრთხოებასაც იცავს. ამის გამო მას "ორმოების ადამიანს" უწოდებენ.

ამ კაცმა არც კი იცის, რომ უზარმაზარ მიწას ფლობს - ბრაზილიის კონსტიტუციის თანახმად, იგი იმ 4 000 ჰექტარი მიწის ერთადერთი მეპატრონეა, სადაც მისი ტომი სახლობდა და სანამ ის ცოცხალია, ამ ტერიტორიაზე არამარტო ყოველგვარი ეკონომიკური საქმიანობაა, არამედ მასზე უცხოთა შესვლაც კი აკრძალულია.

როგორც აღვნიშნეთ, უცნობია არა მარტო ამ ადამიანის ტომის სახელი, არამედ მათი სალაპარაკო ენაც. ტომი 70-იან-80 წლებში თითქმის მთლიანად იყო განადგურებული და 1995 წლისთვის სულ 6 ადამიანისგან შედგებოდა. "ორმოების ადამიანის" 5 თანატომელი 1995 წელს ფერმერებმა მოკლეს, რათა ტომის საკუთრებაში არსებულ მიწას დაპატრონებოდნენ. მარტოხელა გადარჩა და უკვე 23 წელია იმალება, თუმცა ბრაზილიის "აბორიგენ ხალხთა სააგენტომ" (Funai) მისი ვიდეოკამერით დაფიქსირება მაინც შესძლო.

Funai-ის მონაცემებით სულ ამაზონის ჯუნგლებში 113 ცივილიზაციისაგან სრულიად იზოლირებული ტომი ცხოვრობს. დღეისათვის რეალურად დადასტურებულია მხოლოდ 27 ტომი.