126 487 ათასი ლარი ავტომობლების შეკეთებისთვის - "საბიუჯეტო თანხები ჩინოვნიკების კომფორტზე იხარჯება"ი

პოლიტიკა - 17:06, 01 Aug, 2018

1073

ხონის მუნიციპალიტეტი ავტომობილების შეკეთებისთვის ბიუჯეტიდან 126 487 ლარს დახარჯავს.

გამგეობამ ავტომობილების შეკეთებისთვის ტენდერი უკვე გამოაცხადა, რომლის პრეისკურანტით გათვალისწინებული ბიუჯეტი 126 487 ლარია. აღნიშნული თანხა, სატრანსპორტო საშუალებების, მათთან დაკავშირებული მოწყობილობების შეკეთებისა და ტექნიკური მომსახურებისთვის დაიხარჯება.

დოკუმენტის თანახმად, ტენდერში გამარჯვებულ პრეტენდენტთან ხელშეკრულება 6 000 ლარზე გაფორმდება,

სატენდერო წინადადების ფასი კი წარმოდგენილი უნდა იყოს სატენდერო დოკუმენტაციის პრეისკურანტში მოცემული საქონლის და მომსახურების ერთეულის ფასების ჯამურ ღირებულების შესაბამისად.

ტენდერის თანახმად, მიმწოდებელი ვალდებულია სამუშაოები 2018 წლის 15 დეკემბრის ჩათვლით დაასრულოს.

უფრო კონკრეტულად, ტენდერით 6 ავტომობილის შეკეთებისთვის გათვალისწინებული თანხაა : მიცუბიში ენდევორი 3.8 2003წ - 18 530 ლარი; ოპელ ვექტრა - 2.0 - 10 601 ლარი ; ფორცვაგენ პასატი 1998 წ 1.8 - 41 965 ლარი; მიცუბიში პაჯერო 3.0 - 18 573 ლარი; ტოიოტო 4რანერი 3.4 - ჯიპი, 1998 წ - 26 009 ლარი; ჩერი ა 5 1.6 - 10 807 ლარი.

თბილისის საკრებულოს ფრაქცია ”ერთიანი ნაციონალური მოძრაობის” წევრი ხონის მუნიციპალიტეტის მაგალითზე ამბობს, რომ ხელისუფლება „პირადი კომფორტისთვის“ თანხებს არ იშურებს.

„პრობლემაა, როცა ასობით ათასი ლარი იხარჯება მაღალი თანამდებობის პირების კომფორტისთვის და მათი ავტომობილების შეკეთებისთვის. საუბედუროდ ეს მარტო ხონში არ ხდება. მე შემიძლია გითხრათ, რომ 1 მილიონი ლარის ავტომობილების შეძენას აპირებს თბილისის მერია, რომელმაც საკრებულოში ახალი ბიუჯეტი დასამტკიცებლად, რამდენიმე დღის წინ შემოიტანა. გვითხრეს, რომ ცხენებით ვერ ვივლითო, ეს მაშინ, როცა მათ 300 - ზე მეტი ავტომობილი ისედაც ემსახურება.

რაც შეეხება ხონის მუნიციპალიტეტის შემთხვევას, თამამად შემიძლია ვთქვა, რომ ბიუჯეტის ხარჯვა მოქალაქეებზე მორგებულად კი არ მიმდინარეობს, არამედ ბიუჯეტის თანხები ჩინოვნიკების კომფორტზე იხარჯება. თქვენ წარმოიდგინეთ, ხონი სადაც 126 487 ლარს დახარჯავს ავტომობილების შეკეთებაზე, ხონისნაირი 62 მუნიციპალიტეტი გვაქვს, თბილისს თავი რომ დავანებოთ. ეს ტენდენციაა პრობლემა და არა ეს კონკრეტული ხელშეკრულება“- აღნიშნა ლევან ხაბეიშვილმა.