"ნარკომანია სატანიზმის მთავარი ნაწილია, ის ადამიანს ამზადებს ეშმაკთან ურთიერთობისთვის"- სამღვდელოება ერის განადგურების საფრთხეს ხედავს

პოლიტიკა - 13:35, 01 Aug, 2018

2934

საკონსტიტუციო სასამართლოს გადაწყვეტილებას მარიხუანას მოხმარების ლეგალიზებასთან დაკავშირებით, სასულიერო პირები დღეს გამართულ პრესკონფერენციაზე გამოეხმაურნენ. დეკანოზი დავით ქვლივიძე აცხადებს, რომ საკონსტიტუციო სასამართლოს გადაწყვეტილება არის ანტისახელმწიფოებრივი:

„ნარკომანია არის სატანიზმის ერთ-ერთი შემადგენელი ნაწილი. სატანის რიტუალის მთავარი ნაწილია. როგორც მარხვა და ლოცვა ამზადებს ადამიანს წმინდა ზიარებისთვის, ნარკოტიკი ადამიანს პირდაპირ ამზადებს ეშმაკთან ურთიერთობისთვის. ეს იწვევს ადამიანის როგორც სულიერ დეგრადირებას, ასევე ფიზიკურ განადგურებას. არამარტო პიროვნების, არამედ მთელი ერების.

ღვინო მაღაზიაში იყიდება, მაგრამ დალიე და დაჯექი საჭესთან - ჩამოგართმევენ მართვის უფლებას. აბა ნასვამმა ჩაიდინე დანაშაული, ორჯერ უფრო მძიმე დანაშაულია. ღვინო შემამსუბუქებელი კი არა დამამძიმებელი გარემოებაა. ასე უნდა გაკეთდეს ნარკოტიკზეც. ნარკოტიკის ზემოქმედების ქვეშ ადამიანს საჭესთან თუ დაიჭერ, აუცილებლად უნდა აუკრძალო მართვა, ასევე, არ შეიძლება სამხედრო პირი იყოს ნარკოტიკის ზემოქმედების ქვეშ. რამდენიმე მეფეა ვინც ამას აკეთებდა და ყველა იყო ან რჯულგადასული ან მის ხელში ქვეყანა გაუბედურებული იყო.

საკონსტიტუციო სასამართლოს გადაწყვეტილება არის ანტისახელმწიფოებრივი და ანტიეროვნული. ამით ფაქტობრივად ერის განადგურება მოხდება. როგორც სერგო ორჯონიკიძე და ფილიპე მახარაძე წითელ არმიას მოუძღოდნენ წინ, დაიპყრეს და გაანადგურეს, ესენი სულიერად ანადგურებენ.

როდესაც წინა ხელისუფლება დაუპირისპირდა ღმერთს და ვამბობდით, მიშა დაისჯება, გვეუბნებოდნენ - მამაო მიშას ვინ რას უზამსო. ჩვენ დღეს ვხედავთ ყოფილი პრეზიდენტი როგორ დარბის სახურავებზე. ხედავთ ხომ, რა დღეშია კაცი? უარესი დაემართებათ ამათ”, - აცხადებს დეკანოზი დავით ქვლივიძე.