ხანძრის დროს საბერძნეთში 6 ქართველი დაშავდა.

სტიქიური უბედურების დროს ხანძრის ეპიცენტრში იმყოფებოდა და სიკვდილს სასწაულად გადაურჩა 50 წლის მარინა მახარაშვილი. სახლი, რომელიც დატოვა, რამდენიმე წამის შემდეგ ცეცხლის ალში გაეხვა. მან 88 წლის მოხუცის გადარჩენაც შეძლო. გადატანილ უბედურებაზე „სარკესთან“ საუბრობს.

„მე ვუვლი 88 წლის მოხუცს, რომელსაც ათენშიც აქვს სახლი, მაგრამ დასასვენებლად კუნძულზე იყო წამოსული და მეც თან ვახლდი. მოულოდნელად სახლში დამწვრის სუნი ვიგრძენი და აივანზე რომ გავედი, ჩემ წინ ყველაფერი ცეცხლში იყო გახვეული.

ჩემს მოხუცს ვუთხარი, ცეცხლია და გავიქცეთ-მეთქი, მან კი მიპასუხა, არსად წასვლას არ ვაპირებ, ეგ ცეცხლი ჩვენამდე ვერ მოვაო.

ხანძარი იმდენად სწრაფად ვრცელდებოდა, რომ მას ვეღარ ვემორჩილებოდი, ხელში ავიყვანე და ისე გავიქეცი. ცეცხლის ალში გახვეული დერეფანი გავიარე. სახლი რომ დავტოვე, უკან მოვიხედე და ცცხლი უკვე ოთახებში იყო შესული. ეს იყო ენით აღუწერელი საშინელი გრძნობა და ტკივილი.

რომ გავრბოდი, ფეხებზე ცეცხლი მეკიდა. ქვემოთ რომ ჩავედით, ხელებით ვიქრობდი ფეხებზე წაკიდებულ ცეცხლს. ქვევით რომ ჩავედით მანქანა ვნახეთ, მძღოლმა გვითრხა, სასწრაფოდ ჩასხედითო და ზვისკენ წავედით, უკან რომ მოვიხედე, უკვე მანქანების საცობი იყო და ფაქტობრივად ერთი ავტომობილიც ვერ მოძრაობდა.

აი , ის ცნობილი კადრი რომ გავრცელდა, დამწვარი მანქანები რომ არის ქუჩაში, მათში სულ ადამიანები ისხდნენ, რომლებიც გადარჩენის მიზნით მანქანით გაქცევას ცდილობდნენ, მაგრამ ვერ მოახერხეს.

ჩვენი სახლი მთლიანად დამწვარია. ასევე დაიწვა ჩემი დოკუმენტები, პასპორტი და ა.შ. 600 ევრო მქონდა მოგროვებული და ისიც ცეცხლმა დაწვა. ჩემი მოხუცისთვის რომ დამეჯერებინა, საქართველოში ჩემს ცხედარსაც ვერ ჩამოასვენებდნენ, სულ დაფერფლილი ვიქნებოდით " - ამბობს მარინა მახარაშვილი .