მოქალაქეების მკვლელობის საქმეზე სომხეთის ყოფილ პრეზიდენტს ბრალი წაუყენეს

მსოფლიო - 11:16, 27 Jul, 2018

2248

2008 წელს ერევანში ოპოზიციის საპროტესტო გამოსვლის დროს მოქალაქეების მკვლელობის საქმეზე სომხეთის ყოფილ პრეზიდენტს რობერტ ქოჩარიანს ბრალი წაუყენეს. მას ბრალად ედება „სომხეთის საკონსტიტუციო წესრიგის დამხობა სხვა პირებთან წინასწარი შეთანხმების შედეგად“. საპროტესტო აქციის მონაწილეებსა და სამართალდამცველებს შორის შეტაკებისას ათი ადამიანი დაიღუპა, მათ შორის პოლიციის ორი თანამშრომელი.

ივლისის დასაწყისში დაპატიმრების ორდერი გაიცა გადამდგარი გენერლის, მიქაელ ჰარუტიუნიანის წინააღმეგ. ის 2008 წლის მოვლენების დროს სომხეთის თავდაცვის მინისტრი იყო. ჰარუთიუნიანს ბრალად ედება დემონსტრანტების წინააღმდეგ შეიარაღებული ძალების უკანონო გამოყენება.

რობერტ ქოჩარიანი სომხეთის პრეზიდენტის თანამდებობას 1998 წლიდან 2008 წლის აპრილამდე იკავებდა.

უცხოური მედია 2008 წლის დემონსტრაციების შესახებ საქმის გამოძიებას სომხეთში ახალი პრემიერ-მინისტრის, ნიკოლ პაშინიანის „ღირსების საქმეს“ უწოდებენ. ფაშინიანი თავად მონაწილეობდა ოპოზიციურ მოძრაობაში, 2010 წელს კი არეულობების ორგანიზების ბრალდებით მას შვიდი წლით თავისუფლების აღკვეთა მიუსაჯეს. 2011 წელს კი ამნისტიით გათავისუფლდა.