სვანეთში აქციის მონაწილეებმა საავტომობილო გზა გახსნეს

სვანეთში აქციის მონაწილეებმა საავტომობილო გზა გახსნეს - რა შეთანხმება შედგა მოსახლეობასთან

პოლიტიკა - 09:47, 27 Jul, 2018

1023

ზუგდიდი-ჯვარი-მესტიის მიმართულებით, ხაიშის მონაკვეთზე მოძრაობა აღდგა. გზის გახსნის გადაწყვეტილება ადგილობრივი მოსახლეობამ თითქმის სამსაათიანი შეხვედრის შემდეგ მიიღო, რომელსაც საქართველოს მთავრობის ადმინისტრაციის რეგიონული განვითარების სამსახურის უფროსი სოზარ სუბარი, შსს-ს გენინსპექციის უფროსი ალექსანდრე ხოჯევანიშვილი, შინაგან საქმეთა მინისტრის მოადგილე მერაბ მალანია, სამეგრელო-ზემო სვანეთის სამხარეო პოლიციის უფროსი ნიკოლოზ დიასამიძე ესწრებოდნენ.

აქციის მონაწილეებთან შეთანხმება შედგა და ავტომობილების მოძრაობა დაახლოებით ღამის 11 საათზე განახლდა. მოსახლეობის თქმით, გზის გახსნის საკითხში მოხდა იმის გათვალისწინებაც, რომ ხვალ კვირიკობის დღესასწაულია.

როგორც ადგილობრივები აცხადებენ, ერთ კვირაში სვანეთში სპეციალურ კომისიას ელოდებიან, რომლებიც ადგილობრივ მოსახლეობასთან ერთად არსებულ პრობლემებზე იმსჯელებენ.

ზუგდიდი-ჯვარი-მესტიის მიმართულებით ხაიშის მონაკვეთი რამდენიმე საათის განმავლობაში პარალიზებული იყო. მესტიის სოფლების ჭუბერისა და ხაიშის მოსახლეობა ხე-ტყის უკანონო მოპოვებასთან დაკავშირებით საგამოძიებო სამსახურის ქმედებებს და სოფელში სპეცრაზმისა და ფინანსური პოლიციის შესვლას აპროტესტებდა.

ფინანსთა სამინისტროს საგამოძიებო სამსახურის განმარტებით ხე-ტყის უკანონო მომპოვებელთა, გაყალბებული დოკუმენტების გამოყენებით ხის მასალის რეალიზატორთა და კანონდარღვევით მოქმედი ხის სახერხი საამქროების გამოვლენა – მხილების მიზნით უწყების თანამშრომლები, ღონისძიებებს მთელი ქვეყნის მასშტაბით ინტენსიურად ატარებენ