როგორც ჩვენთვის ხდება ცნობილი, ოზურგეთის საკრებულოს თავმჯდომარე, დავით დარჩია ამ წუთებში გურიის პოლიციის დეპარტამენტში დაკითხვაზე იმყოფება.

ჩვენთვის მოწოდებული ინფორმაციით, საკრებულოს თავმჯდომარე პოლიციის მესამე სართულზე არაკანონიერად ჩატარებული აუქციონებისა და მიწების გასხვისების სკანდალზე იკითხება.

გურიის შავიზღვისპირა ზოლში ოზურგეთის მუნიციპალიტეტის გამგეობის მიერ 2014-17 წლებში გაყიდული მიწების ირგვლივ სკანდალი გრძელდება-უშიშროება ოზურგეთის მაღალჩინოსნების დაკითხვას აგრძელებს.

როგორც "გურიის მოამბესათვის" გახდა ცნობილი, სუსი-ს ანტიკორუფციული სამსახურის დეპარტამენტში, ამ დღეებში, ამ საკითხთან დაკავშირებით, ოზურგეთის მაშინდელი გამგებლის მოვალეობის შემსრულებელი არჩილ ყაზაიშვილი ხელმეორედ დაკითხეს.

თბილისში მისი დაკითხვა რამდენიმე საათს გრძელდებოდა.

მანამდე "სუს" მა ოზურგეთის ყოფილი გამგეობის რამდენიმე მაღალჩინოსანი-სამსახურის ხელმძღვანელები - მალხაზ გორგოშიძე და გოჩა აბაშმაძე დაკითხა.

როგორც გავრცელებული არაოფიციალური ინფორმაციით ხდება ცნობილი, გამოძიება ოზურგეთის მუნიციპალიტეტის მაშინდელ გამგეობას აუქციონის გამოყენებით მიწების უკანონოდ გაყიდვას ედავება.

ასევე არაოფიციალური ინფორმაციით, საუბარია სახელმწიფოსათვის დაახლოებით 15 მილიონ ლარის ზარალზე, რომელიც ბიუჯეტმა გასაყიდ მიწებზე ფასების ხელოვნურად დაგდებით განიცადა.