სდსს-ს ყოფილი უფროსის თემურ ჯანაშიას ადვოკატი აცხადებს, რომ ბიძინა ივანიშვილის განკარგულების თანახმად, 2013 წელს სახელმწიფო დაცვის სახელმწიფო სამსახურს პრეზიდენტის ხარჯების ანაზღაურების გაგრძელება ძველი წესით დაევალა. განცხადება ბექა ბასილაიამ "პირველი რადიოს" რადიოკლუბში გააკეთა

"ჩვენ მოვისმინეთ დაანონსებული განაჩენი ეკა ბესელიასგან ისე, რომ ამ საქმეზე ჯერ არსებითი განხილვაა. ჩვენ მოვისმინეთ ბიძინა ივანიშვილისგან საბოლოო ვერდიქტიც. ბიძინა ივანიშვილს, ალბათ, არ ახსოვს, რომ 2013 წლის 15 თებერვალს, როდესაც საქართველოს პრემიერ-მინისტრი იყო, მისი ხელმოწერით მიღებულია მთავრობის განკარგულება, რომლის თანახმადაც, სახელმწიფო დაცვის სპეციალურ სამსახურს, რომელსაც პრეზიდენტის დაცვა უნდა უზრუნველეყო, დაევალა იმავე ფუნქციების შესრულება რა ფუნქციებსაც ასრულებდა პრეზიდენტის ხარჯების ანაზღაურებასთან დაკავშირებით. ანუ მიხეილ სააკაშვილი „ნაციონალური მოძრაობის“ ხელისუფლებაში ყოფნის პერიოდში როდესაც სდსს-ს მეშვეობით გასწევდა გარკვეულ ხარჯს, იმავე ტიპის ხარჯების გაწევასთან დაკავშირებით ბიძინა ივანიშვილმა მიიღო 2013 წლის 15 თებერვალს განკარგულება და ნება დართო პრეზიდენტის დაცვის სამსახურს გაეგრძელებინა მსგავსი ხარჯების გაწევა. დღეს რასაც ბიძინა ივანიშვილი ეძახის გაფლანგვას, ამ პროცესში ის თავად იყო ჩართული. და არა მხოლოდ ჩართული, არამედ მისი სამართლებრივი აქტია გამოცემული. შესაბამისად, ამ საქმეში თეიმურაზ ჯანაშია არის შერჩევითი სამართლის მსხვერპლი", - განაცხადა ბექა ბასილაიამ.