ამერიკის შეერთებული შტატების სახელმწიფო დეპარტამენტი “ყირიმის დეკლარაციას” აქვეყნებს და კიდევ ერთხელ მოუწოდებს რუსეთს, შეწყვიტოს ყირიმის უკანონო ანექსია.

დოკუმენტში ნათქვამია, რომ რუსეთის მიერ ყირიმის უკანონო ანექსიის არაღიარება აშშ-ის პოლიტიკის უცვლელი შემადგენელი ნაწილია. დოკუმენტს ხელს აშშ-ის სახელმწიფო მდივანი მაიკ პომპეო აწერს.

დოკუმენტში აღნიშნულია, რომ 2014 წელს უკრაინაში შეჭრის და ყირიმის ანექსიით, რუსეთი საერთაშორისო პრინციპებისთვის ძირის გამოთხრას შეეცადა.

“მაშინ როდესაც დემოკრატიული სახელმწიფოები ცდილობენ თავისუფალი, სამართლიანი და წარმატებული სამყაროს შექმნას, ჩვენ უნდა დავიცვათ ჩვენი ვალდებულება სუვერენული თანასწორობის საერთაშორისო პრინციპთან მიმართებით და პატივი ვცეთ სხვა სახელმწიფოების ტერიტორიულ მთლიანობას“- წერია დეკლარაციაში.

რუსეთის საგარეო საქმეთა სამინისტროს ოფიციალური წარმომადგენელი მარია ზახაროვა აშშ-ის სახელმწიფო დეპარტამენტის მიერ გამოქვეყნებულ „ყირიმის დეკლარაციას“ გამოეხმაურა. მისი თქმით, მანამდე ირანის „ბირთვული შეთანხმება“ და პარიზის კლიმატური ხელშეკრულებაც აშშ-ის სახელმწიფო პოლიტიკის შემადგენელი ნაწილი იყო, თუმცა აშშ-ის პრეზიდენტმა დონალდ ტრამპმა ეს შეცვალა.

„როგორც გვახსოვს, ირანის „ბირთვული შეთანხმების“ ერთობლივი სამოქმედო გეგმაც და პარიზის კლიმატური ხელშეკრულებაც აშშ-ის პოლიტიკის ნაწილი იყო. ეს თავად ბარაკ ობამამ გადაწყვიტა. თუმცა დონალდ ტრამპმა გადაიფიქრა. ჩვენ ძალიან კარგად ვიცით ასეთი „საბედისწერო დეკლარაციების“ ფასი“ - ამბობს ზახაროვა.