„ივანიშვილი შეშინებულია და დროის მოსაგებად, საპრეზიდენტო არჩევნებში ბრძოლის ველიდან გაქცევას ცდილობს“

„ივანიშვილი შეშინებულია და დროის მოსაგებად, საპრეზიდენტო არჩევნებში ბრძოლის ველიდან გაქცევას ცდილობს“ - ბაჩუკი ქარდავა

პოლიტიკა - 14:08, 25 Jul, 2018

1929

ოლიგარქს არ შესწევს უნარი, რამე შეცვალოს და მხოლოდ თავდაცვის ინსტიქტებით მოქმედებს. ივანიშვილი შეშინებულია - ასე აფასებს ,,ქართული ოცნების“ თავმჯდომარის გუშინდელ ინტერვიუს ,,ეროვნულ-დემოკრატიული პარტიის“ ლიდერი ბაჩუკი ქარდავა, რომელიც ივანიშვილის განცხადებებს სოციალურ ქსელში ეხმაურება.

„ივანიშვილის ოლიგარქიულმა მმართველობამ მოარყია სახელმწიფო ინსტიტუტები, ქვეყანა განადგურების პირასაა, ხალხი უმძიმეს გასაჭირში ცხოვრობს, კატასტროფულად გაიზარდა სიღატაკის ზღვარს ქვემოთ მყოფი ოჯახების რაოდენობა.

ივანიშვილი იძულებული გახდა ეღიარებინა, რომ ქვეყანაში მწვავე პოლიტიკურ-ეკონომიკური კრიზისია. აღიარება, ცხადია შიშმა განაპირობა. ოლიგარქს კარგად ესმის, რომ არ შესწევს უნარი, რამე შეცვალოს და მხოლოდ თავდაცვის ინსტიქტებით მოქმედებს. ის ცდილობს საზოგადოებაში გააჩინოს განწყობა - ,,ბელადმა არაფერი იცოდა“, შესაბამისად, განტევების ვაცს თანაგუდელებში ეძებს. ამ ეტაპზე მან კვირიკაშვილი შეირჩა, მაგრამ ეს მხოლოდ დასაწყისია, ყველაფერი რაც მოვისმინეთ ივანიშვილის ინტერვიუში ხალხის აშკარა დაცინვაა,

ხალხი, რომელსაც გაუნათლებელს ეძახის, გონიერია, ის გრძნობს სიყალბეს, აქვს უნარი, განსხვავებით დღევანდელი მართველებისგან, სახელმწიფოებრივად იაზროვნოს და ბევრიც ითმინოს, მაგრამ ამ დაცინვაზე ივანიშვილის „ოცნება“ ოქტომბერში სწორედ ამ ხალხისგან საკადრის პასუხს მიიღებს.

ივანიშვილი საპრეზიდენტო არჩევნებში ბრძოლის ველიდან გაქცევას ცდილობს და ამით დროის მოგება სურს. რაც ყველაზე მნიშვნელოვანია, გამოიკვეთა, რომ ოლიგარქს ეშინია ჩვენი ერთობის, ოპოზიციის საერთო კანდიდატის. ესაა შიში ერთობის - ძალა ერთობაშია! ჩვენ აუცილებლად გავიმარჯვებთ გრიგოლ ვაშაძესთან ერთად და ჩვენ დავიცავთ ამ გამარჯვებას!“ - წერს ბაჩუკი ქარდავა.