"მაცივარი გვაქვს, მაგრამ ცარიელია" – რატომ რჩება ბევრი სოციალურად დაუცველი ოჯახი დახმარების გარეშე?

პოზიცია - 20:24, 23 Aug, 2013

1997

ამ ვალდებულების შესასრულებლად, უპირველეს ყოვლისა, აუცილებელია სოციალური დახმარების გაწევის სამართლიანი და მიზნობრივი მექანიზმის არსებობა.

საზოგადოებისათვის არაერთი შემთხვევაა ცნობილი, როდესაც სახელმწიფოსაგან დახმარებას ღებულობდა ოჯახი, რომელსაც ამის საჭიროება არ ჰქონდა და პირიქით დახმარების გარეშე რჩებოდნენ რეალურად გაჭირვებული და შემოსავლის არმქონე პირები.

რეფორმატორთა კლუბს მიგვაჩნია, რომ პრობლემის მთავარი მიზეზი სოციალურად დაუცველი ოჯახების შეფასების დღესდღეობით არსებული მეთოდოლოგიაა. მოქმედი კანონმდებლობის თანახმად, ოჯახის შეფასება ხორციელდება ოჯახის წევრების (რაოდენობა, ასაკი, განათლება), შემოსავლების, უძრავი და მოძრავი ქონების მონაცემების გათვალისწინებით. შეფასებას ახდენს სოციალური მომსახურების სააგენტოს თანამშრომელი, რომელიც ახორციელებს ოჯახში ვიზიტს და ინფორმაციას ღებულობს ოჯახის წევრებისაგან, ასევე ათვალიერებს საცხოვრებელ ადგილს და იქ არსებულ ნივთებს.

ბუნებრივია ასეთი შეფასება არ იძლევა რეალურ სურათს ოჯახის ეკონომიკური შესაძლებლობების შესახებ – ოჯახის წევრები შეიძლება ოფიციალურად არსად არ მუშაობდნენ და არ ღებულობდნენ ხელფასს, არ იყვნენ რეგისტრირებული როგორც გადასახადის გადამხდელები, არ ჰქონდეთ ბანკში გახსნილი ანგარიშები, მაგრამ რეალურად ჰქონდეთ შემოსავალი სხვადასხვა სამუშაოებიდან, მცირე ვაჭრობიდან; კონკრეტული ნივთების არსებობა არ შეიძლება გახდეს დახმარების გაწევაზე უარის თქმის საფუძველი, – ,,მაცივარი გვაქვს, მაგრამ ცარიელია."

რეფორმატორთა კლუბის აზრით, ოჯახის სოციალურ–ეკონომიკური შეფასების მეთოდოლოგიაში ძირითადად გათვალისწინებული უნდა იქნას:

– ოჯახის წევრთა სამეწარმეო, შრომითი აქტივობა და არა კონკრეტული ნივთების არსებობა, რომელსაც დამოუკიდებლად შემოსავალი არ მოაქვს;

– სამეწარმეო, შრომითი აქტივობის შესწავლისას სოციალური მომსახურების სააგენტომ, გარდა ოჯახის წევრების გამოკითხვისა, თვითონ უნდა მოიძიოს ინფორმაცია მათი საბანკო ანგარიშების, გადასახადების, მუშაობის, შემოსავლების; შრომისუნარიანობის, ჯანმრთელობის მდგომარეობის შესახებ შესაბამისი ორგანიზაციებიდან;

– სოციალური მომსახურების სააგენტო მჭიდროდ უნდა თანამშრომლობდეს ადგილობრივ თვითმმართველობებთან, რათა მიიღოს ობიექტური ინფორმაცია ოჯახის საქმიანობისა და შემოსავლების შესახებ, როდესაც პირები ეწევიან არარეგისტრირებულ მეწარმეობას – სოფლად მცხოვრები ოჯახი ეწევა პროდუქტების რეალიზაციას საცხოვრებელი სახლიდან, რაც ცნობილი შეიძლება იყოს მხოლოდ სოფლის გამგეობისათვის და მეზობლებისათვის.

რეფორმატორთა კლუბს მიგვაჩნია, რომ ამგვარი მიდგომების შედეგად:

• სახელმწიფოს სოციალური პოლიტიკა გახდება უფრო სამართლიანი

• საგრძნობლად შემცირდება არამიზნობრივი ხარჯები

• სახელმწიფოს მიეცემა შესაძლებლობა დასახოს სიღარიბესთან ბრძოლის რეალური და ეფექტური გზები

ირაკლი კობიძე

"რეფორმატორთა კლუბი"