"მთლიანად გადამწვარია საბავშვო ბანაკი, ხალხი მანქანებში დაიწვა"

"მთლიანად გადამწვარია საბავშვო ბანაკი, ხალხი მანქანებში დაიწვა" - შემზარავი ცნობები საბერძნეთიდან

მსოფლიო - 15:10, 24 Jul, 2018

3289

საბერძნეთში, ათენის სიახლოვეს, ტყეში ხანძრის შედეგად დაღუპულთა რიცხვი 60-მდე გაიზარდა, დაშავებულია 100-მდე ადამიანი. ხანძრის გაჩენის მიზეზად მაღალი ტემპერატურა სახელდება, რომლის გავრცელებასაც ქარმა შეუწყო ხელი.

დაღუპულთა უმრავლესობა სავარაუდოდ, ბავშვია, რადგან გავრცელებული ცნობით, ხანძარმა საბავშვო ბანაკი გაანადგურა.

წითელი ჯვრის ინფორმაციით, 26 ცხედარი იპოვეს ზღვისპირა სოფელ მატიში მდებარე ერთ-ერთ ვილაში, ეს სოფელი სტიქიის ეპიცენტრში მდებარეობს.
აღნიშნულ ფაქტზე სოციალურ ქსელში წერს საბერძნეთში მცხოვრები მარიან ყიფიანი.

"საშინელი ტრაგედია საბერძნეთში, კერძოდ ათენის შემოგარენში. ხანძრის შედეგად დაიღუპა 53 ადამიანი. 150 დაშავებული, ათობით ადამიანი დაკარგული, გადამწვარია მთლიანად საბავშვო ბანაკი, ხალხი დაიწვა მანქანებში და რაც ყველაზე საშინელი სანახავი იყო, 26 ადამიანი თავმოყრილი ერთ მინდორში, ერთმანეთს ჩახუტებული იპოვეს დამწვარი. ეს ძალიან დიდი ტრაგედიაა. ცეცხლი 47 ადგილას იყო გაჩენილი. ვუსამძიმრებ ბერძენ ხალხს, დაღუპულთა ოჯახებს და ვიზიარებ მათ მწუხარებას, თუმცა არ არის ჯერ ცნობილი ვინმე ქართველიც თუ არის მათ სიაში, რადგან ოჯახს დაჩაზე მიჰყავთ ხოლმე დასასვენებლად მოხუცები და ჩვენი გოგოებიც თან ჰყავთ. ვუსურვებ გაძლებას ყველას.
უფალი გფარავდეთ!" - წერს მარინა ყიფიანი.