31 წლის სამხედროს სერგო ჯიმშერაშვილის ცემის ფაქტი - საქართველოს თავდაცვის მინისტრი ლევან იზორია „შაბათის კურიერში“ გასულ რეპორტაჟს ეხმაურება.

ბრალდებული სამხედროების ადვოკატები აცხადებენ, რომ თავდაცვის უწყებამ მომხდარის შესახებ იცოდა, თუმცა დამალა და სამხედრო პოლიციამ ფაქტი არ გამოიძია. დაზარალებულის ოჯახმა მთავარ პროკურატურას მიმართა და მომხდარის შესახებ ცნობილი, მხოლოდ ამის შემდეგ გახდა.

ლევან იზორიას განცხადებით, შემთხვევა სამხედრო ნაწილში არ მომხდარა და შესაბამისად, სამხედრო პლიციამ საკუთარი კომპეტენციის ფარგლებში იმოქმედა.

„სამხედრო პოლიციამ იმოქმედა და ჰქონდა მყისიერი რეაგირება, თავის კომპეტენციის ფარგლებში, რათა დაედგინა, ალკოჰოლური სასმელის მიღების ფაქტს ჰქონდა თუ არა ადგილი სამხედრო ნაწილის ფარგლებში. ის ბრალდება, რომ თითქოსდა სამხედრო პოლიციამ პროცესუალურად არ იმოქმედა, ჯერ ერთი ამას კანონი უკრძალავს და შეზღუდულია”, - აღნიშნავს იზორია.

მინისტრის განმარტებით, სამხედრო პოლიციას თავდაპირველად ინფორმაცია მიაწოდეს, რომ ჯაშიაშვილმა დაზიანებები წაქცევის შედეგად მიიღო. იზორიას თქმით, უწყებისთვის რეალური ინფორმაცია მოგვიანებით გახდა ცნობილი.

„არ ჰქონდა ინფორმაცია, ჰქონდა ინფორმაცია, რომ ადამიანი სამხედრო მოსამსახურე, რომელიც სხვებთან ერთად სვამდა გახდა შეუძლოდ, წაიქცა, დაზიანდა. სწორედ იმის გამო, რომ იმალებოდა დანაშაული სამხედრო მოსამსახურეების მხრიდან ისინი პასუხისგებაში არიან მიცემული. პირველადი ინფორმაციით, ასეთი შეტყობინება შევიდა სწორედ სამოქალაქო პოლიციაში“-ამბობს მინისტრი.