გიორგი მარგველაშვილი NATO-საქართველოს თანამშრომლობასთან დაკავშირებით პუტინის განცხადებას ეხმაურება

პოლიტიკა - 18:08, 19 Jul, 2018

1374

საქართველოს პრეზიდენტი ვლადიმერ პუტინის განცხადებას ეხმაურება. გიორგი მარგველაშვილის განცხადებით საქართველო კვლავაც მიისწრაფვის დავების მშვიდობიანი მოწესრიგებისაკენ, საქართველოსა და NATO-ს თანამშრომლობა კი ემსახურება უსაფრთხოებას რეგიონში და ხელს უწყობს სტაბილურობას თავად რუსეთის ფედერაციის სამხრეთ საზღვრებთან.

„საქართველო კვლავაც მიისწრაფვის დავების მშვიდობიანი მოწესრიგებისაკენ. ჩვენი არაერთი შეთავაზებაც რუსეთის ფედერაციისადმი მიზნად ისახავს არსებული კონფრონტაციული პარადიგმის შეცვლას თანამშრომლობის სივრცით. მაგრამ ნდობის აღდგენა შეუძლებელია მეზობელი სახელმწიფოს ტერიტორიული მთლიანობის დარღვევითა და სუვერენიტეტის შელახვით.

პოზიტიური დღის წესრიგისაკენ გადადგმული პირველი ნაბიჯი უნდა იყოს 2008 წლის 12 აგვისტოს შეთანხმების შესრულება და ლტოლვილთა და დევნილთა უსაფრთხო და ღირსეული დაბრუნება საკუთარ საცხოვრებელ ადგილებში.

რაც შეეხება ნატოს, საქართველოსა და ალიანსის თანამშრომლობა ემსახურება უსაფრთხოებას რეგიონში და ხელს უწყობს სტაბილურობას თავად რუსეთის ფედერაციის სამხრეთ საზღვრებთან.“- განაცხადა გიორგი მარგველაშვილმა.

შეგახსენებთ, რუსეთის პრეზიდენტმა ვლადიმირ პუტინმა დღეს კიდევ ერთხელ დააფიქსირა თავისი პოზიცია იმასთან დაკავშირებით, რომ თუ საქართველო ან უკრაინა ნატო-ში გაწევრიანდება, რუსეთი შესაბამისად უპასუხებს.

პუტინი დასავლეთის ქვეყნებს ურჩევს, საქართველოსა და უკრაინის ნატო-ში გაწევრიანების შემთხვევაში, შესაძლო შედეგებზე დაფიქრდნენ.