რუსეთის პრეზდიენტმა ვლადიმირ პუტინმა კიდევ ერთხელ დააფიქსირა თავისი პოზიცია იმასთან დაკავშირებით, რომ თუ საქართველო ან უკრაინა ნატო-ში გაწევრიანდება, რუსეთი შესაბამისად უპასუხებს.

პუტინი დასავლეთის ქვეყნებს ურჩევს, საქართველოსა და უკრაინის ნატო-ში გაწევრიანების შემთხვევაში, შესაძლო შედეგებზე დაფიქრდნენ.

„ამგვარ აგრესიულ ნაბიჯებზე, რომლებიც რუსეთისთვის პირდაპირ საფრთხეს წარმოადგენს, თანაზომიერ რეაგირებას მოვახდენთ. ჩვენი კოლეგები, რომლებიც გამწვავებაზე თამაშობენ, უკრაინისა და საქართველოს ალიანსის სამხედრო ორბიტაში ჩართვისკენ მიისწრაფიან. უმჯობესია, დაფიქრდნენ ამგვარი უპასუხისმგებლო პოლიტიკის შესაძლო შედეგებზე“ - განაცხადა პუტინმა რუსეთში აკრედიტებულ ელჩებთან შეხვედრაზე.

შეგახსენებთ, რამდენიმე დღის წინ "ფოქს ნიუსთან" ინტერვიუში პუტინმა განაცხადა, რომ თუ საქართველო ან უკრაინა ნატო-ში გაწევრიანდება, რუსეთის რეაქცია „უკიდურესად უარყოფითი“ იქნება.