სკრიპალების მოწამვლის საქმე - თავდასხმაში მონაწილე ყველა ადამიანი წარმოშობით რუსეთიდანაა

მსოფლიო - 12:40, 19 Jul, 2018

2269

ბრიტანელმა სამართალდამცველებმა , ყოფილი რუსი ორმაგი აგენტისა და მისი შვილის, სერგეი და იულია სკრიპალების მოწამვლის საქმეში ეჭვმიტანილთა ვინაობა დაადგინეს.

როგორც ბრიტანული მედია წყაროზე დაყრდნობით იუწყება, ქალაქ სოლსბერიში, მამა-შვილზე ნეირო-ტოქსიკური ნივთიერება “ნოვიჩოკის” გამოყენებით განხორციელებულ თავდასხმაში, რამდენიმე ადამიანი მონაწილეობდა და ყველა მათგანი წარმოშობით რუსეთიდანაა.

შეგახსენებთ, დიდი ბრიტანეთის ქალაქ სოლსბერიში, ყოფილი რუსი ორმაგი აგენტი 66 წლის სერგეი სკრიპალი და მისი 33 წლის შვილი იულია, 4 მარტს მოწამლეს. როგორც ექსპერტიზამ დაადგინა, ისინი რუსეთში წარმოებული ახალი თაობის ნერვული აგენტით მოწამლეს, სახელწოდებით "ნოვიჩოკი." მამა შვილი-რამდენიმე კვირა კომატოზურ მდგომარეობაში იმყოფებოდნენ, თუმცა გადარჩნენ.

ცნობილი გახდა ისიც, რომ სპეციალისტებმა ნერვულ-პარალიტიკური ნივთიერება სკრიპალების სახლში აღმოაჩინეს. გავრცელდა ვერსია, რომ სკრიპალები სახლის კარის საკეტზე წასმული "ნოვიჩოკით"მოიწამლნენ. მეორე ვერსიით, "ნოვიჩოკს" სკრიპალებისთვის რუსეთიდან ჩატანილი წიწიბურა შეიცავდა.

რუსეთის დაზვერვის ყოფილი თანამშრომლის მოწამვლის საქმეზე ლონდონმა მოსკოვიდან ახსნა-განმარტებები მოითხოვა და 24 საათიანი ვადა მისცა მოსკოვს , თუმცა პასუხი ვერ მიიღო. შედეგად კი ბრიტანეთმა მოსკოვს სანქციები დაუწესა.

ბრიტანეთმა რუსეთის უმაღლეს ხელისუფლებასთან ყველა დონის ურთიერთობა გაწყვიტა და ქვეყნიდან 23 რუსი დიპლომატი გააძევა. ბრიტანეთის მხარდასაჭერად მსოფლიოს 28 ქვეყნიდან , მათ შორის საქართველოდან, საერთო ჯამში 150 რუსი დიპლომატი გააძევს.