ჭიჭინაძის შემდეგ გედევან ფოფხაძე? - "ოცნების" უმრავლესობა საპრეზიდენტო არჩევნების წინ იშლება

პოზიცია - 11:15, 19 Jul, 2018

2493

მას შემდეგ, რაც „ქართული ოცნების“ ხუთკაციანმა სათათბირომ ისნის რაიონის მაჟორიტარი, დეპუტატი დავით ჭიჭინაძე პარტიიდან გარიცხა, პოლიტიკურ კულუარებში გამძაფრდა მოსაზრება, რომ მმართველ გუნდში დიდი კრიზისია.

„დისციპლინური სასჯელის“ შესახებ თავად „დასჯილმა“ ჭიჭინაძემაც პოსტ-ფაქტუმ შეიტყო. პოლიტიკის ანალიტიკოსები პირად საუბრებში იმასაც ამბობენ, რომ „ოცნება“ ჩვეულებრივი კომუნისტური პარტიაა, რომელიც კრიტიკას ვერ იტანს და ყველას, ვისაც განსხვავებული აზრი აქვს, მტრად აცხადებს.

ამასთან, როგორც ჩვენი წყაროები გვეუბნებიან, ჭიჭინაძე „პირველი მერცხალია“ და მის ბედს მალე ბევრი სხვაც გაიზიარებს. როგორც „ნიუპოსტისთვის“ ხდება ცნობილი, ამ დროის მონაცემებით, „ოცნების“ სათათბირო კულუარულად უკვე მსჯელობს გედევან ფოფხაძის შესაძლო გარიცხვაზეც. სხვათა შორის, ფოფხაძეს „ოცნების“ დატოვება ღიად ზაქარია ქუცნაშვილმა უკვე ურჩია.

ვერ ვიტყვით, რომ ფოფხაძე, ჭიჭინაძის მსგავსად, ანარქისტია, მაგრამ ჭიჭინაძის გარიცხვის შემდეგ ბატონმა გედევანმა მწვავე განცხადება გააკეთა და აღნიშნა:

„თუკი პარტიაში ყოფნის სტანდარტი იმას ნიშნავს, რომ ყველაფერზე ერთი პოზიცია უნდა არსებობდეს, არ მგონია, ასეთ პარტიაში დარჩენის სურვილი ბევრს ჰქონდეს. შეუძლიათ პარტიას „ქართული ოცნების“ ნაცვლად კომკავშირი ან კომპარტია დაარქვან და ეს უფრო ადეკვატური იქნება... მაინტერესებს, ამ პოლიტიკური გუნდის შიგნით რა პრინციპებზე ხდება ერთმანეთთან ურთიერთობა და რაში მდგომარეობს დავით ჭიჭინაძის მიმართ პრეტენზია, რომ პარტიიდან მოსული მესიჯებით არ ცხოვრობს და არ აზროვნებს?! თუ ეს არის ჭიჭინაძის მიმართ პრეტენზია, მე სოლიდარული ვარ მის მიმართ. მე მაინტერსებს ამ ყველაფრის დასაბუთება! რატომ ირიცხება ჭიჭინაძე პარტიიდან – რუსეთის აგენტია? შპიონაჟშია ეჭვმიტანილი? კორუფციაზეა საუბარი? რაც შეეხება ეთიკურობის საკითხს, ეთიკურობა ძალიან შეფასებითი კატეგორიაა. ერთს რაც არაეთიკურად მიაჩნია, მეორეს მიაჩნია პრინციპულად, სწორად და სამართლიანად! მაშინ საზოგადოებას ვკითხოთ, თუ როგორია ეთიკის სტანდარეტები. არ მგონია, რომ დათო ჭიჭინაძეზე უფრო ეთიკურად იქცეოდეს ბევრი სხვა, რასაც ჩვენ ბევრისგან ვითმენთ. ყველაფერზე სათქმელი, ბოლომდე ითქმება - თუ ასე დაისვა საკითხი, რაზეა ლაპარაკი“.

ზოგადად, გედევან ფოფხაძე ის სუბიექტია, რომელიც მაშინ აქტიურდება ხოლმე, როცა „ოცნებაში“ რაღაც რიგზე ვერ არის. შესაბამისად, კულუარებში ამბობენ, რომ ფოფხაძე ზემოხსენებული განცხადებით კობახიძის „სასტავს“ ცეცხლი გაუხსნა და მას მხარი შესაძლოა, უმრავლესობაში შემავალმა „სოციალ-დემოკრატებმაც“ აუბან.

ყოველივე ზემოთქმულიდან გამომდინარე, არსებობს მოლოდინი, რომ იგივე საპრეზიდენტო არჩევნების წინ „ოცნების“ უმრავლესობა მარტივ მამრავლებად დაიშალოს და შესაძლოა, ისეც კი მოხდეს, რომ მმართველმა გუნდმა საპრეზიდენტო კანდიდატის დასახელებაც კი ვერ მოახერხოს.

ოფიციალური ინფორმაციით, ჭიჭინაძის პარტიიდან გარიცხვის მიზეზი ის გახდა, რომ მან ეთიკის ნორმები დაარღვია და აწ უკვე ყოფილ თანაგუნელებს ხშირად საჯაროდ აკრიტიკებდა. სხვათა შორის, ჭიჭინაძე პირველი დეპუტატი იყო, რომელმაც თავის დროზე იგივე გიორგი კვირიკაშილის მთავრობას გადადგომისკენ ღიად მოუწოდა და ასევე, „ოცნებაში“ „კოლექტიური ზარდიაშვილების“ წინააღმდეგაც გაილაშქრა. მაშინ ეს ყველაფერი ე.წ. ძველებისა და ახლების დაპირისპირებად მოინათლა. ამ დროის მონაცემებით, ისე ჩანს, რომ გამარჯვება „ახლებს“ დარჩათ, მაგრამ როგორც კულუარებში ამბობენ, კობახიძე-ჩუგოშვილის გამარჯვების სიხარული ნაადრევია, რადგან დიდი ალბათობით, მალე შესაძლოა, უმრავლესობის დახურული „სხადნიაკი“ გაიმართოს“, რომელსაც სავარაუდოდ, ბიძინა ივანიშვილიც დაესწრება. ელოდებიან, რომ ამ „სხადნიაკზე“ კობახიძეს პასუხის გაცემა ბევრ კითხვაზე მოუწევს.

ამასთან, არ გამორიცხავენ, რომ „ოცნებამ“ პარლამენტის თავმჯდომარის შეცვლის გადაწყვეტილება მიიღოს და საპრეზიდენტო არჩევნებამდე კობახიძეს სპიკერის თანამდებობა დაატოვებინოს.