10-მა ოპოზიციურმა პარტიამ გუშინ ქუთაისში, ბაგრატის ტაძრის ეზოში საერთო საპრეზიდენტო კანდიდატი წარადგინა. გრიგოლ ვაშაძემ წარდგენის შემდეგ იმ გეგმებსა და პროგრამაზე ისაუბრა, რომლებსაც არჩევნებში გამარჯვების შემთხვევაში განახორციელებს.

„ემსახურე საქართველოს“ ლიდერი მურმან დუმბაძე აცხადებს, რომ ქვეყანას გადარჩენა სჭირდება და ამის შანსი არსებობს:

„ქვეყანა არის გადასარჩენი, სიღარიბეა არის გასაჩერებელი, ქვეყნის დამტოვებელთა რიცხვი დღითიდღე იზრდება, ეკონომიკურად მოსახლეობას უკიდურესად უჭირს, ასე რომ არსებობს შანსი იმისა, რომ ქვეყანა გადარჩეს“, - აღნიშნა მურმან დუმბაძემ.

„სახელმწიფო ხალხისთვის“ ლიდერი ნიკა მაჭუტაძე აცხადებს, რომ ქვეყანამ არჩევნების საშუალებით დემოკრატიული უფლებებისა და თავისუფლებების დაბრუნება უნდა შეძლოს:

„ამ არჩევნებზე ჩვენ ან დავიბრუნებთ, დავიბრუნებთ აი ამ უმაღლეს პოლიტიკურ, ნაციონალურ, საზოგადოებრივ, დემოკრატიულ უფლებებს და თავისუფლებებს, ან ნამდვილად დავიღუპებით“, - აღნიშნა ნიკა მაჭუტაძემ.

„ქრისტიან-კოსნერვატიული პარტიის“ ლიდერის შოთა მალაშხიას განცხადებით, ძირფესვიანად უნდა შეიცვალოს ის, რაც საქართველოში ხდება:

„ძირფესვიანად უნდა შეიცვალოს ის რაც ხდება საქართველოში, ეს არის ბრძოლა სახელმწიფოებრიობისთვის, იმიტომ, რომ ივანიშვილმა დაანგრია, მოსპო სახელმწიფო, გაზპრომის მონად გაგვხადა, ამას ყველაფერს სჭირდება გამოსწორება“, - აღნიშნა შოთა მალაშხიამ.

„საქართველო ლიდერთა შორის“ მამუკა გამყრელიძე აღნიშნავს, რომ ოპოზიციის გაერთიანება იძლევა იმის საშუალებას, რომ მოხდეს ერის კონსოლიდაცია:

„ეს გაერთიანება იძლევა იმის საშუალებას, რომ მოხდეს ერის კონსოლიდაცია და მართლაც ამ შესანიშნავ და ძალიან საინტერესო კანდიდატს დაუჭირონ მხარი“, - განაცხადა მამუკა გამყრელიძემ.

„სამოქალაქო ალიანსითავისუფლებისთვის“ ლიდერი ზურაბ ხარატიშვილი აღნიშნავს, რომ სიტუაცია თუ არ შეიცვალა, შესაძლოა სახელმწიფოებრიობა საერთოდ დაიკარგოს:

„სიტუაცია თუ არ შევცვალეთ და ქვეყანა ჩიხიდან არ გამოვიყვანეთ, ჩვენ შეიძლება დავდგეთ იმ რეალობის წინაშე, როცა ჩვენ სახელმწიფოებრიობა საერთოდ დავკარგოთ, დავკარგოთ ის, რაც ჩვენმა თაობებმა სისხლითა და ოფლით დღემდე მოიტანეს“, - განაცხადა ზურაბ ხარატიშვილმა.

„ახალი საქართველოსთვის“ ლიდერი ნიკოლოზ ვაშაკიძე აცხადებს, რომ არსებობს გამარჯვებისთვის ყველა წინაპირობა:

„კნდიდატიც ძლიერი გვყავს, სტრატეგიას და პროგრამას გაეცნობა ქართველი ამომრჩეველი, ძალიან შინაარსიანი და საინტერესო. ამიტომ, ყველა წინაპირობაა გამაჯვების“, - აღნიშნა ნიკოლოზ ვაშაკიძემ.