„ერთიანი ნაციონალური მოძრაობის“ წევრი თინათინ ბოკუჩავა ვლადიმერ პუტინის განცხადებას ეხმაურება და აღნიშნავს, რომ ამ შემთხვევაში მთავარია რა იქნება საქართველოს ხელისუფლების პასუხი. პუტინის განცხადებით, რუსეთის პასუხი იქნება ნეგატიური ნატო-ს გაფართოებაზე:

„პუტინმა ეს მუქარა პირველად არ გააჟღერა. ღიად აქვს ნათქვამი, რომ 2008 წელს მას საქართველოში ომი რომ არ დაეწყო, ქვეყანა ნატო-ს წევრი უკვე იქნებოდა. აქ მთავარია, საქართველოს ხელისუფლების პასუხი რა იქნება. სამწუხაროდ, დღეს ჩვენ გვყავს ხელისუფლება, რომელიც ომს საქართველოს აბრალებს, რომელიც თავის პოზიციებში პრინციპული არ არის და, რომელიც საერთაშორისო რესურსს მაქსიმალურად არ იყენებს, რომ ჩვენი ნატო-ში და ევროკავშირში გაწევრიანება დაჩქარდეს.

ამისთვის საჭიროა, ამ მთავრობის შეცვლა და საქართველოს ხელისუფლების სათავეში ისეთი მართლაც პროდასავლური და პროაქტიური ჯგუფის მოსვლა, რომელიც პუტინის პოზიციის მოუხედავად, შეძლებს ჩვენი საერთაშორისო თანამეგობრობის დახმარებით, ქვეყანა ნატო-ში გააწევრიანოს და ამით ჩვენი ქვეყნის უსაფრთხოება და წინსვლა უზრუნველყოს“, – განაცხადა დეპუტატმა.