საქართველოს თავდაცვის ყოფილი მინისტრის თინა ხიდაშელის განცხადებით, მან პუტინის განცხადებიდან დაინახა, რომ შეხვედრაზე დონალდ ტრამპი საქართველოსა და უკრაინის ლობისტი იყო. როგორც ხიდაშელმა აღნიშნა, პუტინმა მუქარები დაიწყო დიდი ხნის წინ, ჯერ კიდევ მიუნხენის კონფერენციაზე და დღემდე აგრძელებს.

„პუტინის განცხადებაში სიახლე არაფერია. მთავარი, ჩემი აზრით, რაც მისი განცხადებიდან შეგვიძლია წავიკითხოთ, ალბათ ის არის, რომ განცხადება პუტინს შემთხვევით არ გაუკეთებია ტრამპი-პუტინის შეხვედრის შემდეგ. ჩემთვის პირადად კითხვის ნიშნები აღარ არსებობს, რომ ამ შეხვედრაზე საქართველოსა და უკრაინის ნატო-ში გაწევრიანებაზე დააყენა საკითხი პრეზიდენტმა ტრამპმა. პუტინის განცხადებაში დავინახე ეს შესაძლებლობა, დავინახე პუტინის მიერ საჯაროდ ნათქვამი უარი ტრამპის სავარაუდო შეთავაზებაზე, მოთხოვნაზე, თუ პირდაპირ დაყენებულ საკითხზე, მიუხედავად იმისა, რომ მან თქვა, ამ თემაზე არ გვისაუბრიაო. ამ მომენტისთვის ყველაზე პოზიტიური, რაც ჰელსინკის შეხვედრიდან დავინახე, სწორედ ეს არის – პრეზიდენტი ტრამპი, ყველა სხვა საკითხთან ერთად, იყო უკრაინისა და საქართველოს ლობოსტი ამ შეხვედრაზე“,- აღნიშნა თინა ხიდაშელმა.

ვლადიმირ პუტინის განცხადებით, რუსეთი ნატო-ს გაფართოებას ნეგატიურად შეხვდება.