რატომ დაუკვეთა "ჯიპას" განათლების სამინისტრომ თანამშრომელთა გადამზადება ტენდერის გარეშე?

საზოგადოება - 19:26, 22 Aug, 2013

772

აღნიშნულის შესახებ "ნიუპოსტს" ინფორმირებულმა პირმა აცნობა. წყაროს ცნობით, რომელიც კვალიფიციური სუბიექტია, ტენდერის გამოცხადება თანამშრომელთა აზრის გათვალისწინების გარეშე მოხდა და სახეზეა ნეპოტისტური სქემა.

სააგენტო ინფორმაციის გადასამოწმებლად განათლების სამინისტროს დაუკავშირდა. სადაც აღნიშნული ბრალდება უარყვეს, თუმცა, განმარტეს, რომ კონკრეტულ სიტუაციაში ტენდერის გამართვა საჭიროებას არ წარმოადგენდა და რეალურად თანამშრომელთა გადამზადება "ჯიპას" მართლაც დაევალა.
უწყების მიერ მოწოდებულ განმარტებას, "ნიუპოსტი" უცვლელად გთავაზობთ:

"ინფორმაცია არ შეესაბამება სიმართლეს.
მოგახსენებთ, რომ 2013 წლის მაისში საქართველოს განათლებისა და მეცნიერების სამინისტროს წერილით მომართა საქართველოს საზოგადოებრივ საქმეთა ინსტიტუტმა (GIPA), რომლითაც ცნობილი გახდა, რომ აღნიშნულ ინსტიტუტში ტარებოდა ინოვაციური სასწავლო კურსი: "საჯარო დიპლომატია, ქვეყნის ბრენდინგი და საერთაშორისო კომუნიკაციები“. პროგრამა განკუთვნილი იყო იმ საჯარო მოსამსახურებისათვის, რომლებსაც ხშირი ურთიერთობა აქვთ მოსახლეობასთან, მედიასთან და საერთაშორისო საზოგადოებასთან.

აღნიშნული კურსის გავლა სამინისტრომ მიზანშეწონილად ჩათვალა ადმინიტრაციის, საზოგადოებასთან ურთიერთობისა და საერთაშორისო ურთიერთობებისა და პროგრამების დეპარტამენტების თანამშრომლებისთვის და ინოვაციური სასწავლო კურსი აღნიშნული დეპარტამენტების ოთხმა თანამშომელმა გაიარა.
გამომდინარე იქიდან, რომ აღნიშნული შესყიდვა მონეტარულ ზღვარში ჯდებოდა, ტენდერის გამოცხადების საჭირო არ იყო.
შესაბამისად, საქართველოს საზოგადოებრივ საქმეთა ინსტიტუტსა და საქართველოს განათლებისა და მეცნიერების სამინისტროს შორის, მიმდინარე წლის მაისში, გამარტივებული შესყიდვის საშუალებით, „სახელმწიფო შესყიდვების შესახებ“ საქართველოს კანონის მე-3 მუხლის 1 პუნქტის “ს1” ქვეპუნქტის საფუძველზე გაფორმდა ხელშეკრულება.
ამასთანავე, გაცნობებთ, რომ USAID-ის დემოკრატიული მმართველობის პროგრამა საქართველოში, საქართველოს მთავრობასთან თანამშრომლობით, 2013 წლის ივლისი-დეკემბერში, საშუალო და მაღალი რგოლის საჯარო მოხელეებისთვის, მმართველობისა და მენეჯმენტის წამყვან სფეროებში, ატარებს მოკლევადიან სასწავლო კურსებს.
აღნიშნული პროგრამით, საქართველოში, სულ 3000 საჯარო მოხელე გადამზადდება. აქედან, 160-მდე მოხელე საქართველოს განათლებისა და მეცნიერების სამინისტროს თანამშრომელია.
ტრენინგები , რომელიც USAID-ის დაფინანსებით ტარდება მოიცავს შემდეგ თემებს:
• საჯარო ინფორმაციის თავისუფლების და „პარტნიორობა ღია მმართველობისთვის“ ინიციატივის სამოქმედო გეგმის იმპლემენტაციის მექანიზმები;
• ეთიკა საჯარო სექტორში/ორგანიზაციული კულტურა
• ადამიანური რესურსების მართვის საფუძვლები
სტრატეგიული დაგეგმარება
• საქართველოს საკანონმდებლო ჩარჩო (სამოქალაქო საპროცესო კოდექსი, ადმინისტრაციული სამართალი)
• პოლიტიკის შემუშავების პროცესი
• მოქალაქეთა მონაწილეობა მმართველობაში
• პრეზენტაციისა და წერის უნარები.
მოკლევადიანი კურსების ჩასატარებლად, USAID-ის დემოკრატიული მმართველობის მიერ კონკურსის წესით შეირჩა ადგილობრივი საგანმანათლებლო და საკუნსულტაციო ორგანიზაციების კონსორციუმი. კონსორციუმის წევრები არიან: ტრენინგებისა და კონსულტაციის ცენტრი (CTC), პოლიტიკისა და მენეჯმენტის საკონსულტაციო ჯგუფი ( PMCG), საქართველოს საზოგადოებრივ საქმეთა ინსტიტუტი (GIPA) და გრიგოლ რობაქიძის სახელობის უნივერისტეტი“, - განმარტავენ უწყებაში.