მოძრაობა გააერთიანებს ჯანსაღ პოლიტიკურ-საზოგადოებრივ ჯგუფებს და საპრეზიდენტო არჩევნებში გამარჯვებით შეცვლის მთავრობას

მოძრაობა გააერთიანებს ჯანსაღ პოლიტიკურ-საზოგადოებრივ ჯგუფებს და საპრეზიდენტო არჩევნებში გამარჯვებით შეცვლის მთავრობას - ბაჩუკი ქარდავა

პოლიტიკა - 11:54, 16 Jul, 2018

1091

15 ივლისს, 10 ოპოზიციურ-პოლიტიკურ პარტიას შორის გამართულ საკონსულტაციო შეხვედრაზე გადაწყდა, რომ ჩამოყალიბდება ახალი პოლიტიკური ერთობა „სამოქალაქო მოძრაობა - „ძალა ერთობაშია“. რომელიც 17 ივლისს ერთიან საპრეზიდენტო კანდიდატს დაასახელებს. დღეს აღნიშნული ორგანიზაცია ოფიციალურად დაფუძნდა და ხელი მოეწერა დეკლარაციას, სადაც გაწერილია ამ მოძრაობის სამოქმედო გეგმები.

„ეროვნულ-დემოკრატიული პარტიის“ ლიდერის ბაჩუკი ქარდავას განცხადებით, სამოქალაქო მოძრაობის მთავარი მიზანი ხელისუფლების შეცვლაა:

„ხელისუფლებას აქვს ჩავარდნა როგორც ქვეყნის შიგნით, ვერ მართავს რეალურად ეკონომიკას და ქვეყანაში იზრდება სიღარიბე, ასევე ჩავარდნა აქვს საგარეო პოლიტიკის კუთხით, რაც დაგვანახა ნატო-ს სამიტმა, სადაც საქართველომ ფაქტობრივად ახალი ვერაფერი მიიღო. ფაქტობრივად ჩვენ გვყავს დღეს ხელისუფლება, რომელიც ვერ მართავს ქვეყანას და ქვეყანაში არის უკუსვლა. ამ ვითარებაში საჭიროა დაუყოვნებლივ და დროულად დაიწყოს ცვლილებები. ცვლილებები რა თქმა უნდა, დაიწყოს ჯერ ხელისუფლებიდან, რომ რეალურად ჩვენ გავლენა და ბერკეტი გვქონდეს იმისა, რომ ქვეყანაში დაიწყოს განვითარება და მოძრაობა წინ, სწორედ ამიტომაც ხდება ამ სამოქალაქო მოძრაობა-ძალა ერთობაშია ჩამოყალიბება, მაკოორდინირებელი ფუნქცია უნდა აიღოს მან თავის თავზე და მისი მიზანი იქნება გააერთიანოს მაქსიმალურად ჯანსაღი პოლიტიკური და საზოგადოებრივი ჯგუფები და ჩართოს ქვეყნის განვითარების საქმეში. რა თქმა უნდა, ჩვენ გვეყოლება ძლიერი საპრეზიდენტო კანდიდატი და ვიბრძოლებთ არა საპრიზო ადგილისთვის, არამედ გამარჯვებისთვის, თუმცა, ეს არ არის ჩვენი საბოლოო მიზანი. ჩვენი საბოლოო მიზანი არის ცვლილებები ხელისუფლებაში, ხელისუფლების შეცვლა და საპრეზიდენტო არჩევნებში გამარჯვების კვალდაკვალ აუცილებლად ჩვენ ამას განვახორციელებთ ამ მოძრაობის ფარგლებში“, - განაცხადა ბაჩუკი ქარდავამ.