რევოლუციის შემდეგ პირველად კუბა კერძო საკუთრების უფლების აღიარებას აპირებს

მსოფლიო - 17:37, 15 Jul, 2018

2006

კუბაზე კონსტიტუციის ახალი პროექტი გამოქვეყნდა. დოკუმენტის მიხედვით, რევოლუციის შემდეგ პირველად, კუბის კონსტიტუციაში კერძო საკუთრების უფლებაზე ჩანაწერი გაჩნდება. თუმცა, აქვე კომუნისტური პარტია კვლავ ძირითად პოლიტიკურ ძალად არის აღიარებული.

2010 წლის შემდეგ "თავისუფლების კუნძულზე" ეკონომიკური მდგომარეობის გაუმჯობესებისათვის გარკვეული რეფორმები ტარდება, თუმცა, ეს ნაბიჯები წინააღმდეგობაში მოდის 1976 წლის შემდეგ არსებულ კანონმდებლობასთან, სადაც კუბა მარქსისტულ-ლენინური სოციალიზმის ქვეყანაა და კერძო საკუთრება და ბიზნესი აკრძალულია.

2011 წელს, უძრავი ქონების რეალიზაციის აკრძალვა გაუქმდა, რის შემდეგაც კუბის მოქალაქეებსა და კუნძულებზე მუდმივად მცხოვრებ პირებს შეუძლიათ საკუთრება გაყიდონ ან შეიძინონ. მანამდე, 1992 წელს კონსტიტუციაში შესწორება შევიდა, რომელიც კერძო საკუთრების უფლებასა და მის განკარგვას ეხებოდა.

დოკუმენტში დემოკრატიული წყობისთვის დამახასიათებელი ცნებებიც გაჩნდა. კონსტიტუციის ახალი პროექტის მიხედვით, ქვეყანაში პრეზიდენტისა და პრემიერმინისტრის ინსტიტუტები შეიქმნება. პრეზიდენტი კი არჩევითი იქნება. მას 5-წლიანი ვადა და ორჯერ არჩევის ლიმიტი ექნება.

კონსტიტუციის ახალი პროექტზე მსჯელობისთვის კუბის ნაციონალური ასამბლეა 21-23 ივლისს შეიკრიბება. კანონმდებლების მიერ მისი დამტკიცების შემთხვევაში საკითხს რეფერენდუმზე გაიტანენ.