იუსტიციის მინისტრობის კანდიდატმა თეა წულუკიანმა ადამიანის უფლებათა დაცვისა და სამოქალაქო ინტეგრაციის, თავდაცვისა და უშიშროების, იურიდიულ საკითხთა და საპროცედურო საკითხთა კომიტეტების გაერთიანებული სხდომაზე განაცხადა, რომ გატარებული რეფორმების უმრავლესობა იუსტიციის სამინისტროსგან იყო ინიცირებული.

გაერთიანებული კომიტეტების სხდომაზე მინისტრობის კანდიდატებს ამ წუთებში უსმენენ. წულუკიანმა იმ რეფორმებზე ისაუბრა, რომელიც მისი განცხადებით, იუსტიციის სამინისტროს სწორი და გამართული მუშაობით იქნა მიღწეული:

"საერთაშორისო წარმატებები იყო არაერთი.მე გამოვყოფ მხოლოდ ადამიანის უფლებათა ევროპულ სასამართლოს, რომელსაც მე 10 წელი იურისტის რანგში ვემსახურე, როდესაც მე იქ ვმუშაობდი მაგალითად, 2011 წელს, იმიტომ რომ საქართველოში ადამიანის უფლებების მასობრივი დარღვევა მიდიოდა, წელიწადში ჩემს მაგიდაზე განსახილველად შემოდიოდა 300-400 და უფრო მეტი საქმე. 2011 წელს ეს იყო მაგალითად 395 ახალი საქმე, რომელთაგან 95% იყო დასაბუთებული, შარშან შევიდა 89 საქმე. 395-დან 89 საქმეს შორის ალბათ, ციფრები თავის თავზე მეტყველებს და ამ 89 საქმიდან უმრავლესობა არის მიუღებელი, ანუ დაუსაბუთებელი.

წარმატება არის ხელშესახები და ეს იმ რეფორმების შედეგია, რომელიც ჩვენ ყველამ ერთად გავატარეთ, უმრავლესობა მათგანი კი იყო ხოლმე იუსტიციის სამინისტროს ინიციტივით თქვენს წინაშე წარმოდგენილი“- განაცხადა წულუკიანმა.