მთავარი პროკურორობის კანდიდატის შალვა თადუმაძის შეფასებით, პროკურატურის უკან დახევის სტერეოტიპი არასწორია და გამამართლებელი განაჩენი ნაკლად არ უნდა ითვლებოდეს. თადუმაძის თქმით, მართლმსაჯულება სწორედ იმიტომ არსებობს, რომ დადგინდეს ჭეშმარიტება:

„სტერეოტიპი, რომ პროკურატურის უნდა ეშინოდეთ და პროკურატურამ არ შეიძლება უკან დაიხიოს, არ არის სწორი. პროკურატურის თუ ვინმეს უნდა ეშინოდეს, უნდა ეშინოდეს იმას, ვინც კანონს არღვევს. პროკურატურის უკან დახევის სტერეოტიპი არასწორია, ნაკლად ითვლება გამამართლებელი განაჩენი, მიუხედავად იმისა, რომ ბრალისა და განაჩენის სტანდარტი სხვადასხვაა. ბუნებრივია, თუ გამამრთლებელი განაჩენის სტანდარტით იქნებოდა საქმის გამოძიება დაწყებული, მაშინ მართლმსაჯულების განხორციელების საჭიროება აღარ იარსებებს. თუ იქნება გონივრულ ეჭვს მიღმა სტანდარტი პროკურატურისთვის დადგენილი, მაშინ გამოძიება საჭირო არ იქნება. პირდაპირ გვეცოდინება, რომ ეს დანაშაული ჩადენილია და პირდაპირ ისე დაისჯება ადამიანი, რომ სასამართლო არ დასჭირდება. ამიტომ არის სტანდარტები, ჭეშმარიტების დადგენასა და სამართლიანობის დადგენას რაღაც ეტაპები სჭირდება.

თუმცა უნდა ეცადოს და განწყობა უნდა ჰქოდნეს, რომ ის გონივრულ ეჭვს მიღმა სტანდარტს დაამტკიცებს თავისი მტკიცებულებების, უნარების მეშვეობით და გამამტყუნებელ განაჩენს დააყენებინებს სასამართლოს, მაგრამ ის, რომ მან გონივრულ ეჭვს მიღმა სტანდარტი ვერ დაამტკიცა, პროკურორის ცუდ მუშაობაში არ უნდა ითვლებოდეს. გამომდინარე იქიდან, რომ კანონი თავად განსაზღვრავს ამ სტანდარტებს, ამ სტანდარტებისთვის მიდგომას”, – განაცხადა თადუმაძემ.