საქართველოს პრემიერ-მინისტრის მამუკა ბახტაძის განცხადებით, სახელმწიფო უწყებების ავტოპარკი წლის ბოლომდე დაახლოებით 1000 ავტომობილით შემცირდება. ამის შესახებ ბახტაძემ დღეს გამართულ ბრიფინგზე ისაუბრა:

„მე წინა ბრიფინგის დროს განვაცხადე, რომ გარკვეულ სტრუქტურებში ის ხარჯი, რომელიც ჩვენ გვაქვს სახელმწიფო ავტოპარკის შენახვასთან დაკავშირებით, არის მიუღებელი და ამ კუთხით არის პრინციპული ნაბიჯები გადასადგამი. მთავრობის სტრუქტურის ცვლილებების ფარგლებში, წლის ბოლომდე უწყებების ავტოპარკი შემცირდება დაახლოებით 1000 ავტომობილით, აღნიშნული მანქანები გადაეცემა რეალიზაციისთვის ფინანსთა სამინისტროს, მათ მაგივრად მოხდება სპეციალური ავტომანქანების შეძენა, პატრულისთვის, გარემოს დაცვითი ოპერაციებისთვის და მსგავსი სპეციალური საჭიროებებისთვის, რათა ჩვენმა ორგანოებმა შეძლონ უკეთესად ფუნქციონირება. ასევე მნიშვნელოვნად შეიზღუდება იმ პირთა წრე, რომლებსაც აქვთ პერსონალური ავტომობილებით სარგებლობის უფლება და დაახლოებით ეგრეთ წოდებული 500 ამიკუთვნებული მანქანა გადაინაცვლებს სამორიგეო პარკში. ეს არის პირველი ნაბიჯი და მოვაყოლებთ სხვა ინიციატოვებს“, - განაცხადა მამუკა ბახტაძემ.